Almaty qalasy boıynsha QR Tuńǵysh Prezıdenti – Elbasy kitaphanasynyń uıymdastarýymen «N.Nazarbaev: dáýir, tulǵa, qoǵam» kóshpeli kórme jobasy ótip jatqany belgili. Sharanyń maqsaty Memleket basshysynyń ıdeıalary men bastamalaryn nasıhattaý jáne ilgeriletý, sonymen qatar halyqtyń mádenı kodyn saqtaýda jáne qazaqstandyq jańa býynnyń sanasyn qalyptastyrýdaǵy stýdent jastardyń rólin zertteý bolyp tabylady. Ýnıversıttegi «Elbasy kitaphanasy» ortalyǵynyń ashylýyna arnaıy kelgen Qazaqstan Respýblıkasynyń Tuńǵysh Prezıdenti - Elbasy kitaphanasy dırektorynyń orynbasary, saıası ǵylymdarynyń doktory, professor Ámirhan Rahymjanov: «Biz 10 qarashadan beri Almaty qalasynda «N.Nazarbaev: dáýir, tulǵa, qoǵam» atty kóshpeli kórme jobasyn ótkizip kelemiz. Atalǵan aýqymdy jobanyń úsh kúnge sozylǵan bir baǵyty Qazaq ulttyq agrarlyq ýnıversıtetinde jalǵasýda. Búgingi ashylyp otyrǵan ortalyq sonyń jemisi. Bul kitaphana oqý ornynyń stýdentteri men oqytýshylaryna ǵana emes, kópshilik qaýymǵa qyzmet etetin bolady», -dedi.
Al Qazaq ulttyq agrarlyq ýnıversıtetiniń rektory, ekonomıka ǵylymdarynyń doktory, UǴA akademıgi Tilektes Espolov oqý ornyndaǵy is-shara týraly aıta kelip: «Astanadaǵy Elbasy kitaphanasynan Prezıdentimizdiń 500 kitabyn aldyq. Jalpy bul kitaphana qorynda Elbasynyń eń tańdaýly júz elýden astam kitaby jınaqtalǵan. Bul – biz úshin, bizdiń belsendi jastarymyz úshin úlken olja. Bul kitaptar, bizdiń jastarymyzdyń rýhanı dúnıetanamyn keńeıtip, bilimderin tolyqtyra túsedi» dedi.
Ýnıversıtettegi kitaphana ortalyǵynyń ashylýy «Rýhanı jańǵyrý: jastar kózqarasy» atty halyqaralyq ǵylymı-tájirıbelik konferensııasymen jalǵasty. Konferensııaǵa Almaty qalasynyń jáne sheteldik joǵary oqý oryndarynyń ǵalymdary, doktorlary, magıstranttary, stýdentteri qatysyp, baıandama jasady. Jınalǵandar «Tarıhı turǵydaǵy Qazaqstannyń jańǵyrý áleýeti», «Ulttyq kod rýhanı sanany jańǵyrtýdyń negizi retinde», «Qazaqstan jastarynyń rýhanı sanasyn jańǵyrtý sharttaryndaǵy tarıhı sana» taqyryptaryna qatysty maǵynaly áńgime órbitti.
Qalmahanbet MUQAMETQALI,
«Egemen Qazaqstan»
