Keshe elýden astam adam qan quıý ortalyǵyna kelip, qan tapsyrdy. Negizi qan tapsyrý aksııasy Jol-kólik oqıǵasy qurbandaryn eske alý kúnine arnaldy. 2005 jyly belgilengen bul halyqaralyq shara jyl saıyn qarasha aıynyń úshinshi jeksenbisinde atalyp ótedi, ol bıyl 19 qarashaǵa tuspa tus kelip tur. Mundaı sharaǵa polıseılerdiń birinshi ret qatysýy emes, tártip saqshylarynyń birsypyrasynda donor kýáligi, belgileri de bar. Oblystyq qan quıý ortalyǵynyń menedjeri Antonına Myshkovestiń aıtýynsha, qostanaılyq polıseıler arasynda donor bolýǵa tilek bildiretinder kóp. Mysaly, bir kúnde qan tapsyrýǵa 70 polıseı kelgen, olardyń elýden astamy qan tapsyrǵan, qalǵany kelesi kúni kelýge kelisken.
«Jol-kólik oqıǵalarynan zardap shekkenderdi donorlyq qandar ajaldan saqtap qalady. Al jolda mundaı aýyr oqıǵalardy ózderi kórip júrgen polıseıler qan tapsyrýdan eshqashan bas tartpaıdy», deıdi polısııa maıory Elena Magasýmova.
Aksııaǵa qatysqandardyń árqaısysy bul kúni bir quty ıogýrt, 567 teńge jáne eki kún demalys aldy.
Názıra JÁRIMBETOVA,
«Egemen Qazaqstan»
