Q.Toqaev 13 qarashada «EO – Úlken Eýrazııa: yntymaqtastyq pen damý vektorlary» sessııasy aıasynda sóz sóıledi. Oǵan Túrkııanyń burynǵy prezıdenti Abdýlla Gıýl, Chehııanyń burynǵy prezıdenti Vaslav Klaýs jáne Slovenııanyń burynǵy prezıdenti Danılo Tıýrk te qatysqan bolatyn.
Eýrazııadaǵy ıntegrasııalyq úderisterdiń damýynda Qytaıdyń «Bir beldeý, Bir jol» bastamasy mańyzdy orynǵa ıe. Q.Toqaevtyń pikirinshe, Qazaqstan qatyspasa, bul uzaq merzimdi, jaqsy úılestirilgen strategııanyń nátıjeli júzege asýy múmkin emes. Qytaı josparlarynyń júzege asýy Eýrazııada ǵana emes, búkil dúnıe júzindegi saıası kúshter men ekonomıkalyq faktorlardyń araqatynasyn eleýli túrde ózgertýi múmkin.
Senat basshysy Eýrazııa Ekonomıkalyq Odaǵyn qurlyqtaǵy ıntegrasııalyq úderisterge tolyqtaı tartý qajettigin, oǵan saıası sebepter, atap aıtqanda sanksııalyq qarsylyqtar kedergi bolyp otyrǵanyn aıtty. Qazaqstan AQSh, Eýroodaq jáne Reseı ustanymdaryn jaqyndatýǵa yqpal ete alady: «Árıne, bul qıyn mindet. Biz ony ońaılatpaımyz. Ol maqsatqa qol jetkizý úshin kóptegen ýaqyt ketedi, biraq, ol máseleler sheshilmeıinshe, eń bolmasa, álemniń osy bóliginde erkin saýda týraly aıtý ońaı bolmaıdy».
14 qarashada pikirsaıys «Eýrazııadaǵy Geoekonomıka: usaqtalǵan mozaıka nemese jobalardyń ortaqtyǵy» sessııasy aıasynda jalǵasyn tapty. Qazaqstan Parlamenti joǵarǵy Palatasynyń Tóraǵasy óz sózinde kóptarapty, onyń ishinde áskerı-saıası sıpattaǵy alýan birlestikterdiń ózara is-qımylyna jan-jaqty toqtaldy.
Q. Toqaev Qazaqstan jáne Ortalyq Azııadaǵy basqa elder bir kezderde Qurama Shtattar qarýly kúshteriniń Aýǵanstanǵa baǵyt alǵanyn qoldaǵanyn eske saldy. Senat Tóraǵasynyń aıtýynsha, bul sheshim sol aımaqtaǵy Talıban ekspansııasynyń jolyn kesýde oń ról atqardy.
Búginde Shanhaı yntymaqtastyq uıymy Azııa qurlyǵyndaǵy qaýipsizdikti qamtamasyz etýdiń negizgi faktory bolyp tabylady. Bul alıans transformasııalanyp, is júzindegi ıadrolyq memleketter Úndistan men Pákistannyń qosylýy esebinen ulǵaıyp otyr. Q.Toqaev alýan túrli kún tártibi bar ShYU dinı ekstremızm, halyqaralyq terrorızm jáne separatızmge qarsy birlesken kúreste ámbebap uıym retinde zor áleýetke ıe ekeni týraly pikirin bildirdi.
Eýrazııadaǵy saıası qarsy turýshylyqtar yqtımaldyǵy týraly aıta kelip, Q.Toqaev «Biz QHR-dyń ekonomıkalyq turǵyda qatysýynan qaýiptenbeýimiz kerek, óıtkeni ol Ortalyq Azııa memleketteriniń múddelerine jaýap berip otyr», - dedi. Tóraǵanyń pikirinshe, Eýrazııada Reseı de zor ról atqaratyn bolady, bul aýqymdy memleketti eshqashan tómendetýge bolmaıdy ári ol múmkin de emes. Qazaqstan týraly aıtqanda, bizdiń elimiz óziniń Reseı aldyndaǵy odaqtastyq mindettemelerinen esh aınymaıdy jáne barlyq saladaǵy ózara is-qımyldy jalǵastyra berýge nıetti.
Tóraǵanyń sózinde Qytaı, Reseı, AQSh jáne Eýropalyq Odaq sekildi iri qatysýshylar múddeleriniń tepe-teńdigi qamtamasyz etilýi qajet ekeni atalyp ótildi. Q.Toqaev jetekshi elder arasyndaǵy básekelestik bolmaýy múmkin emes, biraq Eýrazııadaǵy adal básekelestik tabystyń kepili bolady jáne bizdiń qurlyqqa burynǵy aıbynyn qaıtarýǵa kómektesedi, dep sanaıdy.
Sol kúni Q.Toqaev Fınlıandııa Parlamentiniń depýtaty, EQYU Parlamenttik Assambleıasynyń bitimgershilik jónindegi Arnaýly ókili Ilkka Kanervany qabyldady.
I.Kanerva «Astana Klýby» aıasynda ótken pikirsaıystardyń nátıjeli ári mazmundy bolǵanyn, sondaı-aq osy sharaǵa halyqaralyq turǵyda basa nazar aýdarylyp otyrǵanyn aıta kelip, Prezıdent N.Nazarbaevtyń erekshe mańyzdy sózin aıryqsha atap ótti. Júzdesýshiler parlamentaralyq ózara is-qımylǵa qarqyn berýge, parlamenttik dostyq toptarynyń áleýetterin kúsheıtýge, sondaı-aq EQYU Parlamenttik Assambleıasy aıasynda syndarly jumystar júrgizýge ýaǵdalasty.
Parlament joǵarǵy Palatasynyń basshysy «EKSPO-2017» halyqaralyq kórmesine belsene qatysqany úshin Fınlıandııa basshylyǵyna alǵysyn bildirdi jáne I.Kanervany aldaǵy jyldyń qazanynda ótetin Álemdik jáne dástúrli dinder lıderleriniń altynshy Sezine shaqyrdy.
