Bir «áttegen-aıy», feldsherlik-akýsherlik pýnkttiń tozyǵy jetip tur. Buryn munda jap-jaqsy medısınalyq ǵımarat bolǵan. Shatyryna, jylý júıesine jóndeý júrgizýdi basy artyq is sanaǵan bılik qulaǵyn ustaǵan sheneýnikter buzǵyzyp tastapty. Onyń ornyna 2005 jyly turǵyzylǵan ambýlatorııalyq ortalyqtyń qazirgi jaıy adam aıarlyq halde. Tóbesi men qabyrǵalary opyrylyp, barmaq syıyp ketetindeı jaryqshaqtar ajdahanyń kózindeı úńireıip tur. Qazir qýanyshtary sý sepkendeı basylyp, sapaly medısınalyq em-dom almaq túgili qoldanylý merzimi jarty ǵasyrǵa laıyqtalǵan ǵımarattyń ishine kirýge de júreksinedi. Oıda-joqta jalp etip, qulap túse me dep qorqady.
Bir túsiniksizi, tórt myńǵa jýyq adamǵa qyzmet kórsetip kelgen ambýlatorııa jabylyp, FAP-qa aınaldyrylǵan. Sol sebepti birqatar kabınetter qańyrap bos qaldy. Syrtqy, ishki kelbetinen kisi shoshıtyn nysandy Kókshetaý qalasyndaǵy «Maredos» kompanııasy salyp 37 mıllıon teńge jumsaǵan kórinedi. Qalaı bolsa solaı turǵyzylǵanyna qaraǵanda «áı der áje, qoı der qoja» tabylmaǵanǵa uqsaıdy. Ony qabyldap alǵan komıssııa sapasyna kóz juma qaraǵan sekildi. Áıtpese memlekettiń mıllıondaǵan qarajaty jelge ushpas edi.
«Múıiz suraımyn dep júrip saqalynan aıyrylǵannyń» kebin kıgen turǵyndar bolsa arada eki jyl óter-ótpesten shańyraǵy opyrylyp ortasyna túskeli turǵan ǵımaratty paıdalanýǵa májbúr. Bir qyzyǵy, nysan qurylysyna saraptama jasalǵanymen, apatty dep tanylmaǵan. Kúrdeli jóndeý kerektigi týraly sheshim shyǵarylǵan. Al sheneýnikterdiń jańa baspana izdep, sabylyp júrgeni anaý! Kimge senersiń?
О́mir ESQALI,
«Egemen Qazaqstan»
Soltústik Qazaqstan oblysy,
Mamlıýt aýdany
