Memleket basshysy tapsyrǵan jedeldetilgen tehnologııalyq jańǵyrtylý jónindegi mindetterdiń oryndalý jaıynan habardar etken Investısııalar jáne damý birinshi vıse-mınıstri Alık Aıdarbaev 2015-2019 jyldarǵa arnalǵan ındýstrııalyq-ınnovasııalyq damý memlekettik baǵdarlamasyn iske asyrýdyń arqasynda óńdeý ónerkásibi aıtarlyqtaı órkendegenin aıtty. Bıylǵy jyldyń on aıyndaǵy kórsetkish boıynsha óńdeý ónerkásibiniń ósimi 5,2 paıyzdy quraǵan jáne mundaı qarqyn barlyq sektorda baıqalǵan. Al bıylǵy alty aıdaǵy jaǵdaı boıynsha eńbek ónimdiligi 14,5 myń AQSh dollaryna jetse, óńdeý ónerkásibiniń eksporty 2017 jyldyń 8 aıynda 23 paıyzǵa ósip, 9,9 mlrd AQSh dollaryn quraǵan.
A.Aıdarbaevtyń aıtýynsha, búginde mınıstrlik «Indýstrııa 4.0»-ge kóshý boıynsha belsendi jumys atqaryp, osyǵan qatysty ónerkásip salasyna taldaý júrgizgen. 600-den astam kásiporyn zerttelgen jumystyń qorytyndysynda olardyń 20 paıyzy materıaldyq-tehnıkalyq jabdyqtalýy jaǵynan, kadrlyq-uıymdastyrýshylyq turǵysynan tórtinshi ındýstrııalyq deńgeıge ótýge daıyn ekeni anyqtalǵan. Bul jaǵynan alǵanda ken óndirisi salasyndaǵy kórsetkish shamamen 40 paıyzdy quraıdy.
Álbette, sıfrly tehnologııalar negizinde qurylatyn ındýstrııalyq damý barysynda bıznes salasyna da ınnovasııalyq jobalardy kóbirek tartý qajet ekeni belgili. Osyǵan oraı kásipkerlik salasyn jańa baǵytta damytý, oǵan «Indýstrııa 4.0» tehnologııalaryn engizýdi dáripteý úshin birqatar sharalar qolǵa alynypty. Aıtalyq, bızneske kómek retinde modeldi sıfrly fabrıkalar qurylady. Osy jyldyń sońyna deıin atalǵan modeldi nusqa qanatqaqty joba retinde keıbir kásiporyndarǵa engiziledi. Osydan keıin sıfrlandyrýdyń jol kartalary ázirlenetin bolady.
Baspasóz konferensııasy barysynda «Qazaqstandyq ındýstrııany damytý ınstıtýty» AQ basqarma tóraǵasy Berik Bekenov «Indýstrııa 4.0» elementterin engizý qazaqstandyq kásiporyndardyń jedel damýyna yqpal etetinin atap ótti. Onyń aıtýynsha, ónerkásipti sıfrlandyrý birinshi kezekte óndiristik shyǵyndardy azaıtyp, eńbek jaǵdaıy men eńbek ónimdiligin jaqsartady. Eń bastysy, ındýstrııanyń jańa kezeńine ótý otandyq kásiporyndardyń arasynda básekelestikti damytady.
Jalpy, «Indýstrııa 4.0» retinde belgili tórtinshi ónerkásiptik revolıýsııa búginde jahandyq ekonomıkalyq mańyzy bar tendensııaǵa aınaldy. Bul ındýstrııalar qazirdiń ózinde damyǵan elderdiń ekonomıkalyq qurylymyn ózgertip, dástúrli salalarǵa jańa sapa darytty. Aqparattyq kommýnıkasııalyq tehnologııa keńinen qoldanylatyn jedeldetilgen ındýstrııa Qazaqstan ónerkásibin jańasha sıpatta damytyp, qoldanystaǵy júıeni jeńildetýge yqpal etedi. Munyń bári aınalyp kelgende ekonomıkamyzǵa oń áser etip, elimizdiń álemdegi 30 ozyq eldiń qataryna kirýine múmkindik jasamaq.
Qymbat TOQTAMURAT,
«Egemen Qazaqstan»
