Memlekettik hatshy ulttyq mereke – Táýelsizdik kúni qarsańynda el damýyna sińirgen erekshe eńbegi jáne jeke úlesi úshin Memleket basshysy tarapynan atap ótilgen qazaqstandyqtarǵa memlekettik nagradalar men syılyqtar tapsyrý ıgi dástúrge aınalǵanyn aıtty.
Marapattalǵandar qatarynda mádenıet, bilim berý, ǵylym, densaýlyq saqtaý salasy qaıratkerleri, memlekettik qyzmetshiler, ekonomıkanyń túrli salasynyń ókilderi, jumysshylar men aýyl eńbekkerleri bar.
Halyqtyń ál-aýqatyn arttyrýǵa baǵyttalǵan Elbasy Nursultan Ábishuly Nazarbaevtyń strategııalyq baǵdarynyń júzege asyrylýy arqasynda Qazaqstan Respýblıkasy tabysty zamanaýı memleketke aınaldy.
Búginde Qazaqstan jańǵyrtylyp jatqan júıeli ózgerister kezeńin bastan ótkerýde. Elimiz jahandyq básekege qabilettilikke qol jetkizý maqsatymen ındýstrııalandyrýdy jalǵastyryp jatyr. Uzaq merzimge arnalǵan «Qazaqstan-2050» strategııasy dáıekti túrde iske asyrylýda.
G.Ábdiqalyqova bıyl 115 el jáne 22 halyqaralyq uıym qatysqan ulttyq joba – Halyqaralyq «Astana EKSPO-2017» mamandandyrylǵan kórmesi tabysty ótkizilgenine toqtaldy. Qazaqstan TMD elder arasynan birinshi bolyp BUU Qaýipsizdik Keńesiniń turaqty emes múshesi atandy.
Rásim sońynda Memlekettik hatshy G.Ábdiqalyqova qatysýshylardy alda kele jatqan Táýelsizdik kúnimen quttyqtap, myqty densaýlyq, otbasylaryna baq-bereke jáne zor tabys tiledi.
