Sharaǵa «Alash» qozǵalysy men qaıratkerleri, ásirese Alash arysy J.Myńbaev týraly zertteý jumystarymen aınalysyp júrgen QDP «Aq jol» Mańǵystaý oblystyq fılıaly jastar qanatynyń jetekshisi Álııa Isaeva men shákirtteri, Mańǵystaý óner kolledji stýdentteri men ustazdary, Tushybek negizgi orta mektep oqýshylary, mektep dırektory jáne aýyl ákimi qatysty.
Sharany júrgizýshi Alash qozǵalysynyń qurylýy HH ǵasyrdyń basynda qazaq tarıhynda bolǵan erekshe oqıǵa, zańdy qubylys ekenin atap ótti. «Sebebi sol kezdegi ár sala boıynsha aldyńǵy qatarly bilim alǵan qazaq zııalylarynyń el bolashaǵyn oılap, sol kezdegi saıası utymdy jaǵdaıdy paıdalanyp týǵan elinde úlken saıası betburys jasap, derbes memleket qurýdy kókseýleri, soǵan áreket etýleri oryndy edi. Biraq, ókinishke oraı, sol kezde Reseıde qulaǵan patsha úkimetiniń ornyna saıası bılikkke kelgen, qara halyqtyń múddesin kózdeımiz, saıası jáne áleýmettik teńdik ornatamyz degen bolshevıkterdiń sózi men isi saı bolmady. Olar ulttyq memleket qurýǵa talpynǵan «Alash ordashylardyń» ózderiniń oılaǵan maqsattaryna jetýlerine kedergi keltiretinin bilip, «Alash orda» úkimetin taratyp, úkimet múshelerine túrli jala jaýyp, repressııaǵa ushyratqany tarıhtan belgili...» deı kele, sózdi alashtanýshy Álııa Isaevaǵa berdi. Álııa Jangeldiqyzy Alash qozǵalysy men «Alashorda» úkimetiniń qurylýy, qyzmeti «Alash» qozǵalysy men Jalaý Myńbaevtyń baılanysy týraly baıandalatyn beıneli fılmdi kórsete otyryp, Alash qozǵalysy qaıratkerleri men sol kezde Qazaq OAK tóraǵasy bolǵan J.Myńbaevtyń qarym-qatynastary, onyń eki ottyń ortasynda júrip qazaq memlekettigin saqtap, eldi asharshylyqtan, azamattardy repressııadan aman alyp qalý úshin sol kezdegi SSSR atty memleket basshysy Stalın, Qazaq ASSR-nyń basshysy Goleshekın sııaqty baskeserlermen tirese otyryp, janqııarlyqpen jumys jasaǵanyn, Mustafa Shoqaı syndy birtýar azamatty NKVD quryǵyna ilinbes úshin Túrikmenstan arqyly shetelge shyǵaryp jiberýge atsalysqanyn t.b. baıandap berdi.
Álııanyń teatr ónerine baýlyp júrgen shákirtteri, jaqynda N.Jantýrın atyndaǵy oblystyq mýzykalyq-drama teatrynda tusaýy kesilgen dramatýrg О́ten Ahmettiń «Elim dep ótken Er Jalaý» atty spektaklinde Jalaý Myńbaevty somdaǵan Ramazan Tańsyqbaev pen Mustafa Shoqaıdy somdaǵan Ǵazız Izturǵanov spektaklden úzindi-dıalog oryndap berdi. Kelýshiler, sonyń ishinde óner kolledjiniń ustazy Manap Qosan men Tushybek negizgi orta mektebiniń dırektory Jubandyqova Altynaı rızalyq sezimderin bildirip, jastarǵa alǵystaryn aıtty, dep habarlady «Otpan» MKQK qyzmetkeri Jomart Aıdarbek.
Gúlaıym ShYNTEMIRQYZY,
«Egemen Qazaqstan».
Mańǵystaý oblysy
