Atalǵan kásiporynnyń qurylǵanyna bıyl 20 jyl tolyp otyr. «Kegok» Aksıonerlik qoǵamy el ómirinde sheshýshi rólge ıe qurylymdardyń biri. Kompanııa ózi qurylǵan 20 jyldyń ishinde elimizdegi elektr torabyn tutastaı derlik jańǵyrtty. Joǵary kerneýli osynaý jeliler Qazaqstannyń birińǵaı elektr júıesine qyzmet etip, mıllıondaǵan turǵyndarǵa, áleýmettik nysandar men zaýyttarǵa elektr qýatyn jetkizip otyr. Osy jelilerdiń ishinde strategııalyq mańyzǵa ıe jobalardyń biri – «Soltústik – Ońtústik» elektr jelisi. Ujym qyzmetkerlerimen kezdesken óńir basshysy sala mamandaryn merekemen quttyqtap, óńirlik dıspetcherlik ortalyqtyń jumysyna sátilik tiledi.
Ońtústik Qazaqstan oblysynda Elbasymyz bekitken «Jasyl ekonomıkaǵa kóshý» konsepsııasy nátıjeli oryndalýda. Atalǵan konsepsııaǵa saı bıylǵy jyly Saıram, Qazyǵurt aýdandarynda eki shaǵyn sý elektr stansııasy el ıgiligine berildi. Sondaı-aq, Shymkent qalasynan Orta Azııada teńdesi joq bıogaz qondyrǵysy kesheni iske qosyldy. Budan bólek, Saryaǵash jáne Maqtaaral aýdandarynda eki iri kún elektr stansııalarynyń qurylys jumystary bastaý aldy.
2018 jyly Tólebı aýdanynda qýaty 2,5 megavatt shaǵyn sý elektr stansııasy paıdalanýǵa beriledi. Odan bólek, Saryaǵash aýdanynda jalpy qýaty 5 megavatt shaǵyn sý elektr stansııasy men Otyrar aýdanynda qýaty 35 megavatt kún elektr stansııasynyń qurylysyn júrgizý josparlanyp otyr.
Aıta keteıik, 2017-2021 jyldarǵa arnalǵan oblystyń eldi mekenderin sapaly elektr energııamen qamtýdyń keshendi is-shara jospary ázirlengen bolatyn. Osy josparǵa sáıkes 2021 jylǵa deıin óńirimizdegi 361 myń 990 turǵyny bar 198 eldi mekendi sapaly elektr energııasymen qamtý kózdelgen. Sonymen qatar, 14 iri qosalqy stansııalardyń qurylysyn júrgizý isi qolǵa alynǵan bolatyn. Osy baǵyttarǵa 2017 jyly respýblıkalyq, oblystyq bıýdjetterden 15,1 mlrd. teńge bólinip, 59 nysannyń (101 eldi mekenderde) qurylys jumystary júrgizilýde. Sonyń ishinde «Nurly jer» baǵdarlamasymen Saryaǵash aýdanyndaǵy 15 jobaǵa Ulttyq qordan 2 320,3 mln. teńge bólingen. Bıylǵy jyly 47 nysannyń qurylysy aıaqtalsa, 12 nysannyń qurylysy 2018 jyly aıaqtalady dep kútilýde. Atalǵan jobalar tolyq júzege asqanda 85 eldi mekendegi 87 myńnan astam turǵyn sapaly elektr energııamen qamtylatyn bolady.
2018 jyly jobasy daıyndalǵan jalpy quny 8,5 mlrd. teńgeni quraıtyn 110 kılovolttyq "Alataý" jáne "Aqjar" qosalqy stansııanyń qurylysyn memlekettik-jekemenshik áriptestik aıasynda júzege asyrý josparlanýda.
