Matchtyń bastapqy 45 mınýtynda Zınedın Zıdan shákirtteri basymdyǵyn kórsetip, adýyndy shabýyldarǵa jıi shyǵyp edi, biraq Ter Shtegen qaqpasynan sańylaý taba almady. Al Andres Inesta bastaǵan top syrt alańda oınaǵannan bolar, jatyrqap, tıisti deńgeıde óner kórsete almady.
Kezdesýdiń 2-mınýtynda buryshtamadan áýeleı kelgen dopqa Krıshtıaný Ronaldý birinshi jetip, esep ashqan. Alaıda, qaptal tóreshisi portýgalııalyqtyń oıynnan tys qalǵanyn birden baıqady. О́z kezeginde «Barselona» sylbyr oınaǵanmen, birdi-ekili shabýyldarǵa shyǵyp júrdi. Birinshi taımnyń sońyna taman Paýlınonyń esep ashatyn sáti bolǵan, biraq Keılor Navas óz ornynan tabyla bildi.
Oıynnyń ekinshi bóligi múldem basqa baǵytta órbidi. Úzilis kezinde katalondyqtardyń bas bapkerden jańa nusqaýlar alǵany kórinip turdy. Sebebi, kók-anarlar dopqa kóbirek ıelik etip, alańnyń ortalyq tusyna «saltanat» qurdy. Alǵashqy taımdaǵydaı sasqalaqtap, orynsyz jerden dop joǵaltpaıtyn boldy. Al alań ıeleri kerisinshe match basyndaǵy «Barselonanyń» kúıin qushty. Beıne bir búkil kúshin sol kezde sarp etkendeı kúıde qaldyrdy.
Nátıjesinde, gol da kóp kúttirmedi. 54-mınýtta ortalyq tustan oıqastaı shyqqan Ivan Rakıtıchke der kezinde eshkim qarsylyq kórsetpedi. Oǵan jaqyndaý bolǵan Mateo Kovachıch Messıdi «kúzetip» júrgendikten aldynan shyǵa almady. Osyndaı erkindikti sezingen horvatııalyq oıynshy dopty sol qaptaldan shyqqan Serhı Robertoǵa jiberdi. Roberto da kóp oılanbastan arǵy bettegi Lýıs Sýareske baǵyttady. Qaqpashymen jeke qalǵan ýrýgvaılyq shabýylshy múmkindigin múlt jibermedi.
Al ekinshi goldyń sáti tipten erekshe. Qaqpa mańyndaǵy qarbalas sátte Danıel Karvahal dopty qolymen qaıtarmaq bolǵan. Biraq sonyń ózinde gol soǵylyp edi. Alaıda, tóreshi goldy esepke almaı, oıyndy birden toqtatty. Karvahaldy alańnan qýyp, penaltı belgiledi. Al on bir metrlik aıyp dobyn Messı sátti oryndaı bildi. Esep 2:0.
Bir oıynshysynan aıyrylǵannan keıin Madrıdtiń jaǵdaıy tipten qıyndady. Al katalondyqtar ejelgi áýenine basyp, qysqa pastaryn jıiletti. Qarsylastaryna dop bermeı, ýaqyt sozýmen júrdi. «Real» sapynda alańǵa jelaıaq Garet Beıl men talantty Marko Asensıo shyqqanmen, jarytyp eshnárse kórsete almady.
Kezdesýdiń sońǵy mınýtynda «Barselona» sońǵy núkteni qoıdy. Oń qaptaldan Lıonel Messı brazılııalyq Marselodan aılasyn asyrǵannan keıin qaqpa mańyndaǵy áriptesterine ádemi pas shyǵardy. Sońǵy úsh mınýtta alańǵa shyqqan Aleısh Vıdal sol tustan tabyla ketip, úshinshi dopty soqty.
Osymen, ishki birinshilikte «Barselona» úshinshi jyl qatarynan «Realdy» «Santıago Bernabeýde» utyp keledi. Al bıylǵy maýsymda katalondyqtar La lıga kestesinde «Realdan» 14 upaıǵa ozyp tur. Árıne, madrıdtikterdiń enshisinde bir oıynnyń artyq ekenin de umytpaǵan jón.
Aıta keter taǵy bir jańalyq, Lıonel Messı búgin áıgili nemis oıynshysy Gerd Mıýllerdiń rekordyn jańartty. Argentınalyq shabýylshy eýropalyq top lıgalardyń ishinde bir komanda sapynda kóp gol soqqan oıynshy atandy. Mıýller «Bavarııada» júrip 525 gol salsa, Messı bul oıynda 526-dobyn soqty.
Aıan ÁBDÝÁLI,
«Egemen Qazaqstan»
