Brıfıngke Investısııalar jáne damý mınıstrliginiń Kólik komıteti men Avtomobıl joldary komıtetiniń basshylary qatysyp, «Nurly jol» baǵdarlamasyn iske asyrýdyń nátıjelerin baıandady. Avtomobıl joldary komıtetiniń tóraǵasy Mereke Pishembaevtyń aıtýynsha, Nurly jol» baǵdarlamasy aıasynda 2015-2016 jyldar aralyǵynda I jáne II tehnıkalyq sanattarǵa aýystyrý arqyly 1,3 myń shaqyrym avtojol qalpyna keltirilgen.
«Batys Eýropa–Batys Qytaı tranzıttik dálizinde, Astana–Temirtaý, Almaty–Qapshaǵaı, Qapshaǵaı–Balpyq bı, Beıneý–Shetpe jáne Kókshetaý–Petropavl baǵyttaryndaǵy qozǵalys tolyǵymen ashyldy. Sondaı-aq Pavlodardaǵy Ertis ózeni arqyly ótetin uzyndyǵy 12 shaqyrymdyq iri kópir ótkeliniń qurylysy aıaqtaldy», dedi komıtet tóraǵasy.
Bıyl Temirtaý–Qaraǵandy ýchaskesinde, Ortalyq–Ońtústik jobalarynda, jalpy uzyndyǵy 1,2 myń shaqyrym bolatyn Astana–Pavlodar–Semeı–Qalbataý, Beıneý–Aqtaý, Aqtóbe–Atyraý, Qapshaǵaı–Taldyqorǵan, Astana–Petropavl jáne Oral–Kamenka ýchaskesinde Ortalyq–Shyǵys jobalary aıasynda qurylys jumystary jalǵastyryldy.
Sonymen qatar uzyndyǵy 511 shaqyrym bolatyn Beıneý–Aqjigit, Shýche–Zerendi, Taskesken–Bahty, Úsharal–Dostyq, Osınov tas joly, Qostanaı–Denısov sekildi alty joba bıýdjettik qarajat esebinen iske asyrylýda.
Sondaı-aq elimizdiń kóliktik áleýetin damytý maqsatynda jetekshi halyqaralyq qarjy ınstıtýttarymen birlese otyryp, uzyndyǵy 3 myń shaqyrymnan asatyn 12 jobany júzege asyrý josparlanyp otyr. Bul óńirlerdegi ekonomıkalyq belsendiliktiń ósýin qamtamasyz etpek.
Baǵdarlama aıasynda 2020 jylǵa qaraı jóndeý jumystary josparlanǵan, onyń jyl saıynǵy qamtýy – 1,5 myń shaqyrymǵa jýyq.
«Nurly jol» baǵdarlamasyn iske asyrýdyń áleýmettik mańyzy da orasan. Bul rette komıtet tóraǵasy 2015 jyldan bastap 70 myńnan astam jumys orny ashylǵanyn, 2018 jyly taǵy 25 myńyn ashý josparda bar ekenin aıtty. Sonymen qatar qazaqstandyq qamtý úlesi 90 paıyzǵa teń.
Al Kólik komıteti tóraǵasynyń orynbasary Dmıtrıı Potlovtyń málimdeýinshe, Almaty-Shý ýchaskesinde jalpy uzyndyǵy 112,37 shaqyrym ekinshi joldy salý jobasyn júzege asyrý boıynsha jumystar bıylǵy jyldyń qarashasynda aıaqtalǵan. Jobany júzege asyrý ýchaskeniń ótkizý qýatyn kúnine 17-den 68 jup poıyzǵa deıin arttyrdy jáne poıyzdyń jol júrý ýaqytyn 1,5 esege qysqartýǵa múmkindik berdi. Onyń aıtýynsha, 2016 jylǵy jeltoqsanda Quryq portynda jylyna 4 mln tonna júk tasymaldaıtyn temir jol parom termınaly iske qosyldy. Onda operasııalar bastalǵan kezden beri shamamen 1,3 mıllıon tonna júk óńdelgen. Qazirgi ýaqytta jylyna 2 mln tonna júkti óńdeıtin jobanyń ekinshi kezeńin iske asyrý jalǵasýda. Bıyl 6 jeltoqsanda ótken ındýstrııalandyrý kúni aıasynda Quryq portyndaǵy avtokólik parom termınaly synaqtan ótkizildi. 2018 jyly 2 kezeń nysandarynyń qurylysyn aıaqtaý josparlanýda. Jalpy alǵanda, jobany aıaqtaǵannan keıin Kaspıı teńizindegi teńiz porttarynyń ótkizý múmkindikteri jylyna 26 mln tonnaǵa deıin jetkizilmek.
2017 jyldyń 30 mamyrynda Astanada jańa «Nurly jol» vokzal kesheni iske qosyldy. Jańa vokzal kesheni 52 poıyzǵa qyzmet kórsetedi. Olardyń ishinde 16 joǵary jyldamdyqty «Tulpar-Talgo», 22 jáne 14 qala mańyndaǵy elektrli poıyzdar bar.
Dınara BITIK,
«Egemen Qazaqstan»
