Komıtet tóraǵasy Darıǵa Nazarbaeva bastaǵan depýtattar birinshi Ulttyq ǵarysh ortalyǵyna kelip, jańadan ashylǵan ǵarysh tehnıkalaryn qurastyrý bıýrosyna bardy. Sapar barysynda «halyq qalaýlylary» bıýronyń óndiristik ýchaskelerin aralap, atqarylyp jatqan jumystarmen tanysty. Ǵaryshtyq apparattardy qurastyrý jáne synaý kesheniniń sehinde bolyp, kórsetilim galereıasyn, ushýdy basqarý ortalyǵyn tamashalady.
Sodan keıin Qorǵanys jáne aeroǵarysh ónerkásibi mınıstri Beıbit Atamqulov depýtattarǵa osy salada ıgi istermen tanystyrdy. Onyń aıtýynsha, keıingi jyldary qazaqstandyq jer serikterine sheteldikterdiń qyzyǵýshylyǵy artqan.
«Aýǵanstan tarapy bizdiń spýtnıkterge qyzyǵyp otyr. Budan bólek, Túrkimenstan elimizdiń jer serigi keskinine tapsyrys berdi. О́zbekstanda telekommýnıkasııalyq spýtnık bolmaǵandyqtan, olarǵa baılanys qyzmetin usyndyq. Aldaǵy ýaqytta Ulttyq ǵarysh ortalyǵy Airbus kompanııasymen birge konkýrsqa túsýdi kózdep otyr. Chılı men Perý de qazaqstandyq jer serigi keskinin qyzyǵatynyn jetkizdi», dedi B.Atamqulov.
Budan bólek, Vedomstvo basshysy jer seriginiń tıimdiligi qalaı qoldanylyp jatqanyn jóninde áńgimelep berdi. Onyń aıtýynsha, Almaty qalasynda jol erejesin buzǵan kólikterdi anyqtaıtyn ǵaryshtyq baqylaý júıesi engizilgen. Sonyń nátıjesinde, júzden astam ereje buzý tirkelgen. Mınıstrdiń aıtýynsha, zańsyz jer basyp alýshylardy, esirtki alqabyn, jasyryn kontrabandany, jol sapasyn jer serigi arqyly anyqtaýǵa múmkindik bar.
«Spýtnıkterdiń kómegi arqyly túrli salada monıtorıng júrgiziledi. Máselen, aýyl sharýashylyǵynda birqatar mindet júktelgen. Jer serigi arqyly topyraqtyń ylǵalyn, eginniń ónimdiligin, jerdi durys paıdalaný máselelerin baqylaımyz», dedi B.Atamqulov.
Budan keıin depýtattar «Eýrokopter Qazaqstan ınjınırıng» JShS tikushaq qurastyrý jáne qyzmet kórsetý zaýytyna baryp, óndiristik alańdarmen, servıstik jáne avıasııalyq oqytý ortalyqtaryn aralady.
Abaı ASANKELDIULY,
«Egemen Qazaqstan»
Sýretti túsirgen Erlan OMAR
