Kópten beri bar tehnıkasyn saılap ázir otyrǵan, áreń otyrǵan kommýnaldyq qyzmet uıymy qııýlasqan kóshelerdiń qaryn tazalaýdy saǵat 05.00-den bastap ketkenimen, úzilissiz qozǵalystaǵy kólikter kóshe tazalaý jumystaryn meılinshe qıyndatqany da ras.
Uıqydan kózin ashqan qala halqyn jáne bir qatty tańdandyrǵany – japalaqtap áp-ádemi jaýyp turǵan appaq qardyń kenet alaı-dúleı qatty quıyndatqan boranǵa ulasýy edi. Nebári 20-25 mınýttaı uıytqyp soqqan qarly quıyn záýlim aǵashtardy, jol jaǵalaı tizilip turǵan baǵandarǵa ilingen jarnama qalqandaryn shaıqap-shaıqap aıaqastynan qalaı bastalsa, bir mezette solaı sap tyıyldy. Bir kún buryn ǵana 8 gradýs jylylyqty kórsetken termometr baǵany –8 gradýsqa deıin tómendedi.
Qala ákiminiń baspasóz qyzmeti kólik keptelisine qaramastan, kóshelerdi qardan bosatý «maıdanyna» 604 arnaýly tehnıkanyń qatysqanyn habarlap jatty. Olarǵa kommýnaldyq qyzmettiń 2322 jumysshysy kómektesken. Barlyǵy 184 arnaıy jasaqtalǵan avtokólik klımattyń aıaqasty aýysýynan bolatyn kóktaıǵaqtyń aldyn alý úshin kóshelerge qum qospalaryn aıamaı shashty. Árıne, mundaı naýqannyń babymen júrýine qaladaǵy myńǵyrǵan qoǵamdyq jáne jeke kólik nópiriniń qozǵalysy kedergi keltiretini bar. Osyǵan oraı qarbalas atqarylǵan barlyq jumys qalalyq IID jol-kólik polısııasynyń kómegimen júzege asty. Tótenshe jaǵdaılar departamentiniń málimetinshe tabıǵattyń oqys minez kórsetýine oraı megapolıste eshqandaı da oqys oqıǵa tirkelmegen.
...Tús aýa Almatynyń aspany shaıdaı ashyldy. Bul jolǵy ulpa qar ádettegideı tez erigen de joq. Qys aıynyń naǵyz yzǵary sezile bastady. Almatyǵa kópten kútken qys tústi...
Talǵat SÚIINBAI,
«Egemen Qazaqstan»
ALMATY
Sýretti túsirgen
Nurmanbet QIZATULY
