Astana qalasy IID málimdegendeı, jańajyldyq mereke kezinde turǵyndar bar nazaryn jaqyndaryna syılyq tańdaýǵa jáne merekelik dastarhan ázirleý úshin azyq-túlik alýǵa aýdarǵandyqtan, qalta urylarynyń qarmaǵyna ońaı ilinip jatady.
«Kóbine qalta urlyǵy adamdar kóp júretin jerlerde, saýda úılerinde, bazarlarda, qoǵamdyq kólikterde jasalady. Sol sebepti, elordalyq polısııa qala turǵyndary men qonaqtaryna jańajyldyq mereke qarsańynda qarapaıym saqtyq sharalary normalaryn saqtaýdy jáne óte qyraǵy bolýdy, jeke zattaryn qaraýsyz qaldyrmaýdy, aqshalary men qujattaryn ishki qaltalarǵa saqtaýyn eskertedi», - delingen taratylǵan habarlamada.
Qazirgi tańda, tártip saqshylary «Urlyq» baby boıynsha jasalǵan birneshe qylmysqa qatysty tulǵalardy anyqtaý sharalaryn júrgizip jatyr.
«Máselen, 26 jeltoqsanda «Magným» saýda úıinde belgisiz bireý áıel azamatshanyń qaltasynan ishinde qujattary men aqshasy bar ámııanyn jymqyryp ketken. Keltirilgen shyǵyn kólemi 150 myń teńgeni quraıdy.
Sonymen qatar, belgisiz tulǵa «Gúljan» saýda úıinde qala turǵynynyń tonynyń qaltasynan quny 180 myń teńge turatyn «iPhone» markaly uıaly telefonyn qoldy qylǵan», - dep málimdedi vedomstvoda.
Atalǵan faktiler boıynsha «urlyq» babymen sotqa deıingi tergep-tekserý júrgizilýde. Jedel qyzmetkerler atalǵan quqyq buzýshylyqty jasaǵan adamdy anyqtaý jáne ustaý boıynsha jedel-izdestirý is-sharalaryn ótkizip jatyr.
