Prezıdent Nursultan Nazarbaevtyń bastamasymen atqarýshy jáne zań shyǵarýshy tarmaqtaryna qosymsha quzyretter berildi. Munyń bári bılik tarmaqtary arasyndaǵy derbestik pen tepe-teńdikti saqtaý úshin jasaldy. Bul – ótken jyldyń saıası saladaǵy mańyzdy bir jemisi.
Elbasynyń ekonomıkalyq, saıası reformalarmen qatar, rýhanı saladaǵy máselelerge nazar aýdarýy da mańyzdy oqıǵanyń biri. Prezıdent N.Nazarbaev «Bolashaqqa baǵdar: rýhanı jańǵyrý» maqalasynda qoǵamdyq sananyń jańǵyrýy jóninde aıtylǵan oılary, saıası saladaǵy ózgeristeri týraly pikiri erekshe. Sonyń nátıjesinde rýhanı salada, qoǵamdyq ómir men ǵylymda úlken betburys paıda boldy. Qoǵamtaný ǵylymdaryn jańasha oqytý, olarǵa qajetti jańa oqýlyqtar shyǵarý, osy saladaǵy pánderdi retke keltirip, olardy bolashaq mamandar daıyndaýǵa paıdalaný − bizge berilgen múmkindik.
2017 jyly Qazaqstan ekonomıkalyq qýatyn kórsetip, álemdik órkenıettiń jolyna shyqqanyn pash etetin birqatar halyqaralyq sharalar ótkizdi. Solardyń biregeıi – EKSPO-2017 halyqaralyq kórmesi. Jas memleket óziniń zor áleýetin álemge dáleldedi. EKSPO-2017 ǵasyrdan ǵasyrǵa sozylatyn, el tarıhynda ózindik orny bar erekshe oqıǵa. Budan bólek, Qazaqstanda Sırııa boıynsha Astana kelissózderi, Islam Yntymaqtastyǵy Uıymynyń jáne Shanhaı yntymaqtastyq uıymynyń sammıtteri ótti.
Tabysty, jemisti bolǵan bıylǵy jyldy qorytyndylaı kele, Ahmet Baıtursynulynyń «Oljaly jerde úlesten, ordaly jerde ornynan, joraly jerde jolynan qalmaýymyz kerek» degen sóziniń údesinen shyqtyq. Qazaqstan ár saladaǵy óz ornyn bekemdedi. О́tken jylǵa ókpe joq. Jańa jyl tabysty, jemisti ári ornyqty bolsyn!
Náýbat QALIEV,
saıası ǵylymdar doktory
