Bıyl oblys ákimi Danıal Ahmetovtiń tapsyrmasyna sáıkes Shyǵys Qazaqstandaǵy 10 kól men sý qoımasynyń sýyna balnelogııalyq zertteý júrgizilip,osynyń nátıjesinde óńirdegi qaı ózen-kóldiń sýy shıpaly ekenin anyqtaýǵa múmkindik týypty.
«Atalmysh zertteý jumystary kórsetkendeı, Besqaraǵaı aýdanynda ornalasqan Shoshqaly kóliniń jaǵasynda kýrorttyq aımaq qurýǵa mol múmkindik bar. Mamandar bul kóldiń sýynyń bir lıtrinde 15 gramnan artyq paıdaly zattar bar ekenin anyqtady. Oǵan qosa kól sýynyń mıneraldyǵy joǵary deńgeıde, ıaǵnı, shıpalyq qasıetteri mol. Shoshqalyǵa shomylý úshin ǵana emes, emdelý maqsatynda da saparlaýǵa bolady», - deıdi oblystyq týrızm jáne syrtqy baılanystar basqarmasynyń basshysy Jasulan Sársebaev.
Basqarma basshysy júrgizilgen zertteý jumystary barysynda Shoshqalynyń mıneraldyǵy oblys boıynsha eń joǵarǵy kórsetkishterge ıe ekendigine kóz jetkizilgenin, kól jaǵasynda zamanaýı standarttarǵa saı shıpajaı ashýǵa bolatyndyǵyn aıtty. Osy maqsatta aldaǵy ýaqytta kólde naqty qandaı aýrýlardy emdeýge bolatynyn anyqtaý jumystary qolǵa alynatynyn jetkizdi.
Aýdan turǵyndarynyń sózine sensek, sýynyń quramy Izraıldegi О́li teńizdiń sýymen bara-bar Shoshqalyǵa shet elden keletin týrıster qatary da az emes. Ásirese Reseıden aǵylatyn týrıster kóp. Sáýir aıynda О́skemende ótken brıfıngte aýdan ákiminiń orynbasary Erbolat Rahmetýllın kól jaǵalaýynda salynatyn jańa shıpajaı kesheniniń jobasy ázirlenip jatqanyn,sonymen qatar kólge aparatyn joldy jóndeý josparlanyp otyrǵanyn aıtqan bolatyn.
Azamat QASYM,
«Egemen Qazaqstan»
Shyǵys Qazaqstan oblysy,
Besqaraǵaı aýdany
