Bireýlerdiń eńsere almaǵan qashyqtyǵyna biz jettik. «Des bere qoımas...» degendermen de ıyq tirestirip qaldyq. Qaýqary myqty, tájirıbesi molyraq ózgelerdi de moıyndattyq. Elbasynyń «Táýelsizdik dáýiri» atty kitabyn oqyp otyrǵanda Táýelsizdiktiń 26 jylyndaǵy elimizdiń baǵyndyrǵan bıik belesteri men sol bıikke jetý jolyndaǵy qıyndyqtar kóz aldyńnan kıno lentasyndaı tizilip ótkendeı áser qaldyrady. Memleket basshysynyń bul týyndysy «Úshinshi jańǵyrýyn» júzege asyryp jatqan memlekettiń qalyptasýyn, oıǵa alǵan isterdiń qolǵa alynǵan sharýalarǵa aınalǵanyn, sanasyn jańarta otyryp, jańa kókjıekti ashýǵa bekingenin, betburysty sátterde tıimdi sheshimder qabyldanǵanyn, ortaq armanmen shabyttanyp, jańa meje belgilengenin tanytady. Qazaqstandyq jolmen júrip, baǵyttan taımaýǵa yqpal etetin asqaq rýhtylyq ta osy kitaptan seziletindeı. Bir sózben aıtqanda, taǵylymǵa toly bul eńbekti egemendiktiń 26 jylynyń jylnamasy deýge bolady.
2017 jyl. Shırek ǵasyrdan astam ýaqyt ótti. Jańa urpaq ósip keledi. Halyqtyń basynan keshkenderin eske sala otyryp, búgingimiz úshin rızashylyq sezimin qalyptastyrýda bul kitaptyń alar orny zor bolmaq. 1991-diń jeltoqsanynda, óz tizginimiz óz qolymyzǵa tıgen tarıhı sátte elin qutty ómirge bastaǵan, ózimizge pana, ózgelerge qyzǵanysh bolǵan el ordasy – Astanany turǵyzǵan, talaı jannyń qasiretine aınalǵan Semeı polıgonynyń únin óshirgen Elbasynyń eren eńbegin eli erekshe baǵalaıdy. Surapyl soǵysqa jastyǵyn qurban etken ardagerlerge qamqor, el erteńi bolar jastarǵa demeý bola bilgen, ultymyzdyń uly qundylyqtaryn asqaqtatyp, ata-baba armanyn oryndap, qazaq tilin memlekettik til etken Prezıdentimizdi barsha qazaqstandyqtar maqtan tutady.
Biz ýaqyttyń araǵa syzat túsirýine jol bermeýimiz kerek. Urpaqtar sabaqtastyǵyn qamtamasyz etip, aǵa býyn men sońymyzdan ergen baldyrǵandardyń saf altynnan kıim kıgen saq babalarymyz ben nanotehnologııalardy meńgerer keler urpaqtyń arasyn jalǵar úzik osy kitap bolar dep oılaımyz. Biz ultymyzdyń aıqyndalǵan uly qundylyqtaryn boıymyzǵa sińire otyryp, zamannyń talabyna jaýap berýimiz shart. «Basty qundylyǵymyz – beıbitshilikti qasterleı bildik», «Jańalyqtyń jyly lebi jáne qaıta túlegen dástúr», «Buryn-sońdy bolmaǵan zııatkerlik órleý» jáne ózge de bólimderden quralǵan Elbasynyń bul kitaby bizdiń tusbaǵdarymyz bolmaq.
«On adam júrgen jerde iz qalady, júz adam júrgen jerde – soqpaq, myń adam júrgen jerde jol qalady», deıdi. Tonnyń ishki baýyndaı birligi jarasqan halyq retinde qazaqstandyq joldan esh taımaýǵa tıispiz, al Elbasynyń «Táýelsizdik dáýiri» atty jańa kitaby bet túzer qubylamyz bolýy kerek.
Anar MYRZAǴALIEVA,
bıologııa ǵylymdarynyń doktory, S.Amanjolov atyndaǵy ShQMÝ prorektory
О́SKEMEN
