Birinshiden, keńeıtilgen strategııalyq áriptestikti ornatý týraly ortaq saıası sheshimder qabyldandy. Bul bıylǵy jyly 26 jyl tolatyn eki el arasyndaǵy jemisti áriptestik odan ári tereńdeı túsetinin bildiredi.
Astana úshin Vashıngton syrtqy saıasattaǵy negizgi áriptes ári ekonomıkadaǵy mańyzdy ınvestor bolyp tabylady. О́z kezeginde, Donald Tramp atap ótkendeı, Amerıka qýatty, derbes jáne táýelsiz Qazaqstandy AQSh-tyń Ortalyq Azııadaǵy senimdi dosy ári strategııalyq áriptesi retinde qarastyrady.
Bul jerde ekonomıkalyq máseleni de atap ótý qajet. Kelissóz qorytyndysy boıynsha ótken brıfıng barysynda Memleket basshysy jalpy somasy 7,5 mlrd dollardan asatyn 20 kelisimshartqa qol qoıý kózdelgenin atap ótti. Astananyń AQSh-pen joǵary tehnologııalar men ınnovasııalyq óndirister transferti boıynsha baılanysty damytýǵa muqtaj ekeni jasyryn emes. Bul turǵydan alǵanda, jańa kelisimder Qazaqstanǵa ekonomıkadaǵy «sıfrlandyrý» máselesin júzege asyrýǵa múmkindik beredi dep senimmen aıtýǵa bolady.
Ekinshiden, D.Tramp pen N.Nazarbaev AQSh pen Qazaqstannyń halyqaralyq jáne aımaqtyq qaýipsizdikti kúsheıtý boıynsha ortaqtasa áreket etetinin rastady.
Bul Qazaqstan men AQSh kúshterin Aýǵanstan boıynsha biriktirýdi bildiredi. Sonymen birge Qazaqstan terrorızmge qarsy kúrestegi AQSh-tyń tabandylyǵyn qoldaıtynyn málimdedi. Eki el basshylary Soltústik Koreıadaǵy ıadrolyq másele boıynsha ortaqtasa jumys isteıtinderin de atap ótti.
Úshinshiden, Qazaqstan men AQSh «S5+1» aımaqtyq únqatysý alańy aıasyndaǵy áriptestikti damytý týraly kelisimge keldi. Bul turǵydan alǵanda, atalǵan alań jumysynan jańa bastamalar kútýge bolady.
Jańa ákimshilik óz jumysyn bastap, D.Tramp «Aldymen Amerıka» degen uran tastaǵan soń Ortalyq Azııada Vashıngtonnyń aımaqqa degen qyzyǵýshylyǵynyń tómendeýi týraly kóp aıtyldy.
Alaıda, N.Nazarbaevtyń sapary men onyń D. Tramppen kezdesýi aımaqtyń Vashıngton úshin joǵary deńgeıde turǵanyn kórýge bolady.
Jumabek SARABEKOV,
Qazaqstan Respýblıkasy Tuńǵysh Prezıdenti – Elbasy Qory janyndaǵy Álemdik ekonomıka jáne saıasat ınstıtýtynyń (ÁESI) jetekshi
sarapshysy
