Ákesi Ismat pen anasy Saltanat Dımash 13 jasqa tolǵanda jumys yńǵaıymen shetelge qonys aýdarýǵa bel býǵan eken. Amerıkada ósken Dımash akademııadan soń polıseı bolyp jumysqa ornalasady. Byltyr esirtki satatyn qylmystyq toptyń basshysyn ustaýda eptilik pen qaırat kórsetkennen keıin 2017 jyldyń úzdik polıseıi atanady. Qazaq balasy jekpe-jek ónerine jaqyn ǵoı. Kásipqoı bokpen aınalysqan Dımash Nııazov búginge deıin 13 kezdesý ótkizip, barlyǵynda da jeńiske jetken.
Qazyǵurttyń Mádenıet saraıynda Amerıkanyń úzdik polıseıi elmen kezdesti. О́rimdeı jastardyń qyzyǵa qoıǵan suraqtaryna jaýap berdi.
– Kezdesý maǵan óte qyzyqty jaǵymdy áser qaldyrdy, – deıdi Dımash. – Ásirese jastardyń sportqa qushtarlyǵy meni qýantty. Kóbisi aǵylshyn tilin biledi eken. Bul óte quptarlyq jaǵdaı. Sebebi álemdik qarym-qatynas tili bolǵandyqtan osy tildi bilgen jaqsy. Qazyǵurt aýyly kishkentaı bolǵanymen munda bolashaqta eldiń atyn shyǵaratyn namysty talantty jastar kóp kórinedi. Olar óz maqsatyna jetetinine senimdimin. Amerıkada qazaqtar kóp. Degenmen mundaǵydaı birin-biri jaqsy qoldaı bermeıdi.
Júzdesýde Dımash júrekjardy sózin aıtty.
– Qazaqstan – bul meniń Otanym! Qazaqtyń qanyndaǵy jaýyngerlik kúsh-qaırat meniń jumysyma ǵana emes, kásibı boksta da kóp serpin beredi. Men AQSh-ta júrsem de, ózimdi qazaq sanaımyn. О́ıtkeni munda meniń atamnyń da, ákemniń de jáne ózimniń de kindik qanym tamǵan. Meni ystyq yqylaspen qarsy alǵan halyqqa zor alǵysymdy bildirgim keledi, – dedi «Nıý-Iorktiń úzdik polıseıi» atalymynyń jeńimpazy.
Baqtııar TAIJAN,
«Egemen Qazaqstan»
Ońtústik Qazaqstan oblysy
