Eshkimniń qysqy Olımpıadaǵa joldamany tegin taratpaıtyny túsinikti. Eki lısenzııa. Tikeleı Tursynbaevanyń arqasynda. Byltyr Helsınkıde ótken álem birinshiliginde Elızabet jaqsy óner kórsetti. О́zine ǵana emes, eline de joldamany julyp alyp berdi. Bul sport túrinen bizde buryn-sońdy bolmaǵan jetistik. Tarıhı. Myqtylarmen saıysty. Buryn ózgelerdiń ónerin kórip, teledıdarǵa telmirip otyrýshy edik. Endi Tursynbaevaǵa jankúıer bolamyz. Taǵy bir qyzymyz Phenchhanǵa barady.
Tursynbaeva Máskeýde týyp- ósken. Muz aıdynyndaǵy alǵashqy qadamdary Reseı astanasymen baılanysty. Alǵashqy bapkeri – Irına Strahova. Syrǵanaýdyń syrlaryn úıretkenderdiń qatarynda Natalıa Dýbınskaıa men Aleksandr Shýbın bar. Keıinirek Elızabet Eterı Týtberıdzeden tálim aldy. Týtberıdze – talaı myqtylardy tárbıelegen tálimger. Tájirbıeli maman qazaq qyzynyń da bıikterden kórinýine kóp ter tókti. 2013 jyly jasóspirimder arasynda Máskeý birinshiliginde Elızabet Tursynbaeva jeńimpaz atandy. Ońaı bolǵan joq. Máskeý birinshiliginde chempıon bolý álem birinshiliginde jeńiske jetýmen para-par. Sol jyly Mınskide ótken Gran-prı jarysynda júldeger boldy. Máskeýdiń mánerlep syrǵanaý mektebinen ótken qazaq qyzynyń jeńisti joly jalǵasa berdi.
Reseı ulttyq quramasyna shaqyrtý aldy. Ákesiniń armany basqa bolatyn. Baıtaq Tursynbaev qyzynyń tarıhı otanynyń namysyn qorǵaǵanyn qatty qalady. 2014 jyldan bastap Elızabet halyqaralyq jarystarda Qazaqstannyń atynan shyǵa bastady. Elızabetti elge aldyrýda Qyzylorda oblysynyń ákimi Qyrymbek Kósherbaevtyń kúsh salǵanyn atap aıtqan jón. Qyrekeń kóp qoldaý kórsetken. Qarjylyq, basqa da qıyndyqtardyń sheshilýine atsalysypty. Ishki birinshilikterde Syr eliniń atynan shyǵyp júr.
2014-2017 jyldary mánerlep syrǵanaýdan Qazaqstan birinshiliginiń jeńimpazy atandy. Elimizde qyzdardan Tursynbaevaǵa teń keletin syrǵanaýshy ázirge joq. 2016 jyly Lıllehamer qalasynda ótken jasóspirimder arasynda álem chempıonatynyń qola júldegeri boldy. 2017 jylǵy Azııa chempıonatynyń qola júldegeri. Ázirge qolany qanaǵat tutyp júrmiz. Byltyr Helsınkıde ótken álem birinshiliginde erkin baǵdarlamada 126,51 upaı enshilep, qossaıys qorytyndysy boıynsha 191,99 upaımen 9-orynǵa ıe boldy. Phenchhanǵa eki joldamany sonda jeńip alǵan.
Elin ǵana emes, ata-anasyn da qatty qýantty. Senimin aqtady. Joldama alý jolynda talaı qıyndyqtan ótti. Halyqaralyq jarystarǵa turaqty qatysý úshin qomaqty qarjy ǵana emes, qasyńda jankeshti qoldaýshyń bolý kerek. Ata-anasy qyzdaryn jarystarda jalǵyzsyratpapty. «Jetistikterimniń barlyǵy – ata-anamnyń qoldaýynyń nátıjesi», deıdi Elızabet.
Búginde Tursynbaeva Toronta qalasynda ataqty bapker Braıan Orseranyń qol astynda jattyǵyp júr. Kanadalyq bapker buǵan deıin 2 Olımpıada chempıonyn tárbıeledi. Endigi basty maqsat – Phenchhanda el namysyn abyroımen qorǵaý. Suhbattarynyń birinde qarshadaı qyz «armanym Olımpıada, álem birinshilikterinde top jarý» degen bolatyn. Qysqy Olımpıadada qazaq qyzy tuǵyrǵa qonsa degen armanymyzdy joǵaryda aıttyq. Sol kún alys emes sııaqty. Sátin salǵaı deımiz.
Erkebulan JOMART,
«Egemen Qazaqstan»
