Jýrnaldyń bas redaktory Baqtııar Qabasov jańa týyndy týraly bylaı deıdi: «Jýrnal qazaq ultynyń óziniń jańasha tańdaý jolyna túsýdegi negizgi jetistikteri men jeńisterin oqyrmandarǵa keńinen jarııa etedi, eńbegi zor, ónegesi mol el azamattarynyń ómirlik ustanymdaryn shynaıy da jarııaly túrde tizbekteıdi. Sońǵy ýaqytta qoǵamymyzda aıryqsha silkinis týdyrǵan «100 jańa esim», «100 jańa oqýlyq», «Qasıetti Qazaqstan», «Týǵan jer» jobalarynyń keıipkerleri bizdiń osy basylym arqyly oqyrmanǵa aq tilek aıtady, jınaǵan tájirıbelerimen bólisedi. Sebebi, biz ustanǵan baǵyt – jańǵyrý baǵyty, jańa turpatty jańǵyrý baǵyty!».
Kóz aldymyzda ózgergen kúlli álemniń jańa tarıhı kezeńi men onyń aǵymyna ıkemdelip, jańa dáýirdiń jaǵymdy jaqtaryn boıǵa sińirýge umtylǵan urpaqtyń ıgi qadamyna rýhanı qoldaý jasaý basylymnyń negizgi ustanymy bolmaq.
Súıinshi danada aýzy dýaly azamattardyń (Nurlan Orazalın, О́mirzaq Aıtbaıuly, Asyly Osman, Orazaly Sábden jáne basqalary) ult tarıhyndaǵy uly beles týraly pikirleri ret-retimen jarııalandy. Jýrnal betindegi Olımpıada jáne álem chempıony, Qazaqstannyń Eńbek Eri, kásipker Jaqsylyq Úshkempirovtiń suhbaty, jazýshy Beksultan Nurjekeulynyń «Orbulaq ónegesi» atty tarıhı-taǵylymdyq maqalasy, aqyn Baqyt Bedelhannyń «Rýh jyry» jáne basqa da qyzyqty maqalalar men ádebı tanymdyq dúnıeler oqyrmanyn beı-jaı qaldyrmasy anyq.
Basylymynyń alqa músheleriniń qatarynda memleket jáne qoǵam qaıratkeri Myrzataı Joldasbekov, Olımpıada jáne álem chempıony, Qazaqstannyń Eńbek Eri Jaqsylyq Úshkempirov, Almaty oblysynyń ákimi Amandyq Batalov, QazUAÝ rektory, akademık Tilektes Espolov bar.
Qazaq, orys, aǵylshyn tilderinde ári túrli-tústi boıaýmen áshekeılengen, oqyrmandarmen aıyna bir ret qaýyshatyn «Rýhanı jańǵyrýdaǵy» №1 jýrnaldyń menshik ıesi – «Asau Media» JK. Talǵar qalasynda «Intellservice» baspahanasynda basylyp shyǵady.
Talǵat SÚIINBAI,
«Egemen Qazaqstan»
ALMATY
