Ol sahnadaǵy otyzjyldyq ómirinde alpystan astam irili-usaqty obrazdy somdaǵan. Tek teatrda ǵana emes, akter Ánýar Boranbaevtyń kıno áleminde de ózindik qoltańbasy bar. Jurt ony «Gaýhartas» arqyly keńirek tanydy. Kádimgi bárimizge keńinen tanys «Gaýhartas» – qazaq kıno óneriniń altyn qoryna jazylǵan biregeı fılm. Sondaǵy basty ról Tastandy somdaǵan akter – Ánýar Boranbaev. Bul kıno buryn teledıdardan túspeıtin edi. Saltanat, Tastan, Qaıyrken sııaqty keıipkerleriniń túrin, sózin, ásirese ánin jatqa biletin edik... Naǵyz talanttar somdaǵan keremet kórkem týyndy. Iá, ondaǵy árbir akterdiń shynaıy sheberligi qazaqtyń kıno ónerin bıik beleske bir kótergen edi. Shyndyǵynda, «Gaýhartas» kınosy tanymaldylyǵy jaǵynan kúlli Keńes Odaǵy boıynsha «Qyz Jibek» fılminen keıingi ekinshi orynda bolypty.
Ánýar Boranbaev – Torǵaı topyraǵynan shyqqan óner ıeleriniń ishindegi shoqtyǵy bıik juldyzy. Eline eren eńbek sińirgen akter 1999 jyly 51 jasynda baqılyq boldy. Qyryqtan asqan naǵyz er shaǵynda bir aıaqtan aıyrylyp, múgedektik halge tússe de, ol ómiriniń sońyna deıin óner jolynan taımady, sońǵy demi qalǵansha óner dep ótti.
Ol uzaq jyldar boıy Qazaq akademııalyq drama teatrynyń akteri bolǵan. Á.Boranbaevtyń akterlik sheberliginiń qalyptasýyna M.Áýezov pesalary boıynsha qoıylǵan spektaklderde oınaǵan rólderi erekshe yqpal etti. Boranbaev kınofılmderge túsip, iri ekrandyq beınelerdi de somdady. Á.Boranbaev Q.Muqashevtyń «Dala dastanyndaǵy» – Ilııas, M.Áýezovtiń «Qarakózindegi» – Syrym, «Aıman-Sholpandaǵy» – Arystan, «Qaraqypshaq Qobylandydaǵy» – Birsimbaı, «Eńlik-Kebektegi» – Kembaı, Á.Nurpeıisovtiń – «Qan men terindegi» Elaman, Sh.Aıtmatovtyń – «Ana – Jer-anasyndaǵy» – Maısalbek, «Aq kemesindegi» – Momyn shal, budan basqa kesek-kesek týyndylardaǵy kesekti rólderde ózin tanyta bildi.
Qazaqstannyń halyq ártisi Á.Boranbaevtyń atynda qazirgi kúni týǵan jeri Qostanaı oblysy, Amangeldi aýdanynda orta mektep, Arqalyq qalasynda kınoteatr bar. Mektep 2000 jyly ashylǵan bolatyn. Ol mekteptiń aýdan ortalyǵynda ashylýyna akterdiń aǵaıyndary, baýyrlary Boranbaevtar áýleti zor úles qosqanyn el biledi. Akterdiń bıylǵy 70 jyldyq mereıtoıynyń atalyp ótýine de Boranbaevtar áýleti qoldaý bildirip, demeýshilik jasap otyr. Onyń bir mysaly – jaqynda osy mekteptiń jıyrmaǵa jýyq oqýshysy bas qala Astanaǵa kelip, elordany aralap, EKSPO qalashyǵynan bastap, ásem qalanyń basqa da mádenı, oıyn-saýyq ortalyqtaryn kórip, qydyrýǵa múmkindik aldy. Biz oqýshylarmen arnaıy uıymdastyrylǵan kezdesýde júzdestik. Kezdesýde akter Á.Boranbaevtyń jary Aqbópe apaı, onyń jalǵyz qyzy men kúıeý balasy da boldy. Ánýar Boranbaevtyń zamandas aǵa-inileri, dámdes, aralas-quralas bolǵan, kózkórgen aǵa-inileri – akademık Saılaý Baızaqov, jazýshy Qaısar Álim, Tańathan Boranbaev, taǵy basqalar sóz sóılep, oqýshylarǵa akter ómirinen taǵylymdy estelikter aıtyp berdi. Al Á.Boranbaev atyndaǵy mekteptiń meńgerýshisi Salıh Mahat óz kezeginde halyq ártisi Á.Boranbaevtyń esimin, óner taǵylymyn ulaǵattap, keıingi urpaqqa jetkizip otyrý ustazdar qaýymynyń paryzy ekendigin, bul rette mundaı ıgilikti sharalardyń tárbıelik mán-mańyzy moldyǵyn aıtyp, qoldaý bildirgenderge mektep ákimshiligi atynan alǵysyn jetkizdi.
Dınara BITIK,
«Egemen Qazaqstan»
