Atalarymyz ańsaǵan Táýelsizdik qolǵa tıgennen keıin onyń irgetasyn qalaǵan, tuǵyryn myqtaǵan ýaqyt ta bir dáýir sanalady. Az da bolsa tutas dáýirge teń kezeń týraly «Táýelsizdik dáýiri» atty kitabynda Nursultan Nazarbaev pýblısıstıkalyq sarynmen kimge bolsa da túsinikti, júrekke jumsaq jylylyqpen baıandaıdy. Jas urpaq bul kezeń tarıhyn bilýge tıis. Osy maqsatpen Qostanaı joǵary polıtehnıkalyq kolledji «Táýelsizdik dáýiri» kitabynyń tusaýkeserin jasaý úshin oblystaǵy qoǵamdyq pikirler kóshbasshylarynyń, oblystyq máslıhat depýtattarynyń, bıznes-qurylym ókilderiniń, oqý-aǵartý salasy ókilderi men oblystaǵy kolledjderdiń stýdent jastarynyń basyn qosty.
Oblys kolledjderinen 500 stýdent qatysqan jıynda oblystyq máslıhattyń hatshysy Saılaýbek Esjanov el Táýelsizdiginiń tarıhy týraly kitaptyń jaryq kórýimen jastardy quttyqtap, onda Elbasy baıandaǵan bizdiń memlekettiligimizdiń qalyptasý ýaqyty týraly mańyzdy eńbek ekenin aıtty. Odan keıin bilim berý salasynyń ardageri, belgili ustaz Svetlana Machneva kitaptyń alǵashqy bólimi, ıaǵnı 1991-1995 jyldar aralyǵyn qamtıtyn Qazaqstannyń alǵashqy jańǵyrýy jóninde áńgime qozǵady. Alǵashqy bes jyl erkindigin endi alyp, qaz basqan el úshin ekonomıkalyq jaǵynan ǵana emes, saıası jaǵynan da asa jeńil bolǵan joq. Bul jyldary josparly ekonomıkanyń kúni bitip, naryq kelýimen baılanysty ekonomıkalyq daǵdarys óz aldyna, jas eldiń memlekettik basty qujattary qalyptasty. Jas memlekettiń zańnamalyq irgetasy qalandy. Osy bólimde naryqtyq jańarý kezinde lıberaldyq reformanyń qajetti jaǵdaıynda Prezıdent zań kúshi bar 147 Jarlyqqa qol qoıady. Al respýblıkanyń burynǵy Joǵarǵy Keńesi jyl boıy nebary 7 zań ǵana shyǵaratyn. Osy mysaldan-aq Táýelsizdiktiń alǵashqy jyldaryndaǵy bel qaıystyrar eńbektiń qandaı bolǵany kóz aldyńa keledi.
Tusaýkeserde kitaptyń odan keıingi bólimderi týraly Qostanaı memlekettik pedagogıkalyq ınstıtýtynyń rektory, tarıh ǵylymdarynyń doktory, professor Erkin Ábilev, Chelıabi memlekettik ýnıversıteti Qostanaı fılıaly dırektorynyń ǵylymı jumystar boıynsha orynbasary, Qazaqstan halqy Assambleıasynyń jáne Qazaqstan Respýblıkasy Prezıdentiniń janyndaǵy Adam quqyǵy komıssııasy sarapshylar keńesiniń múshesi Álimjan Bekmaǵambetov sóz qozǵady.
– Elbasy Nursultan Nazarbaevtyń tarıhı-pýblısıstıkalyq janrda jazǵan bul kitabynyń qundylyǵy Táýelsizdik tuǵyryn qalyptastyrý tarıhyn keshendi túrde alyp qarastyrady. Eldiń Táýelsizdik jyldary saıası, ekonomıkalyq áleýmettik júıesiniń ózgerýin jınaqtap, keshendi túrde zerttegen mundaı kitap Qazaqstanda áli joq. Osy 26 jylda Táýelsizdik týraly jazylǵan kitaptardy avtorlardyń árqaısysy óziniń zerttegen saıası nemese ekonomıkalyq, áleýmettik turǵydan jekeleı alyp qana jazdy. Al mynandaı jınaqtap, birtutas aıtyp bergen eshkim joq, – dedi Erkin Amanjoluly.
«Táýelsizdik dáýiri» kitaby jas qazaqstandyqtarǵa memlekettiń qalaı qalyptasýy men eldiń qalaı ósýin baıandaıdy. Ony jastar oqyp qana qoımaıdy, odan úırenýi, saıası, ekonomıkalyq oı-óristerin keńeıtýi de kerektigi aıtyldy jıynda.
– Bul kitap oqý úderisinde paıdalanylýy tıis. Ol barlyq bilim berý deńgeıinde, ıaǵnı mektepterde, tehnıkalyq jáne kásibı bilim berý, joǵary oqý oryndarynda oqytylýy jaǵyn oılastyramyz. Búgingi oqýshy, stýdent elimizdiń erteńgi mamandary, kóshbasshylary dep bilsek, búgingi jastar bul kitaptan ózderin tolǵandyrǵan suraqtardyń barlyǵyna jaýap tabady dep oılaımyn, – dedi Qostanaı joǵary polıtehnıkalyq kolledjiniń dırektory, oblystyq máslıhattyń depýtaty Alma Dosjanova.
Jıynda Táýelsizdik jyldary memlekettiligimizdiń qalyptasýyn baıandaǵan Elbasy Nursultan Nazarbaevtyń kitaby týraly mańyzdy pikirler aıtylyp qana qoımaı, ol ánmen, bımen órnektelip otyrdy. Kitaptyń tusaýkeserinde patrıottyq sezimge toly jastyq jiger de baıqalyp turdy.
Názıra JÁRIMBET,
«Egemen Qazaqstan»
QOSTANAI
