«О́skemen tıtan-magnıı kombınaty» AQ – shıkizat óndirýden bastap daıyn ónim shyǵarýǵa deıingi tolyq óndiristik sıkldi qamtıtyn álemdegi eń iri tiginen ıntegrasııalanǵan tıtan óndirýshilerdiń biri. 2025 jyldyń qorytyndysynda shamamen 87 mlrd teńgege 12 myń tonna tıtan satyldy. Bıyl tıtan quımalary men qorytpalary óndirisi 7%-ǵa óspek. Kásiporyn ónimderi aeroǵarysh salasynda, munaı-hımııa jáne atom ónerkásibinde, medısına men keme jasaý óndirisinde qoldanylady. Otandyq tıtannyń aeroǵarysh salasynyń jahandyq naryǵyndaǵy úlesi shamamen 20%-dy quraıdy. О́skemen tıtan-magnıı kombınaty – «Boeing», «Airbus», «Safran», «Rolls-Royce», «TIMET», «Howmet Aerospace», «Dynamet», «PCC» jáne «POSCO» sııaqty jetekshi halyqaralyq ónerkásiptik korporasııalardyń bekitilgen jetkizýshisi.
О́TMK-niń 2033 jylǵa deıingi ınvestısııalyq baǵdarlamasyna nazar aýdaryldy. Oǵan jalpy somasy 255,5 mlrd teńge bolatyn 25 joba kiredi. Olardyń ishinde, kásiporynnyń jobalyq qýatyn jylyna 10 myń tonnaǵa ulǵaıta otyryp, keýekti tıtan óndirý boıynsha jańa seh salý, gaz tazartý jabdyǵyn jańǵyrtý, biryńǵaı ónerkásiptik MES-júıesin engizý, sondaı-aq óndiristik derekterdi, energııany tutynýdy, tehnologııalyq baqylaýdy jáne ónerkásiptik qaýipsizdikti taldaý úshin jasandy ıntellekti men taldaý platformasyn iske qosý bar. Osy jobalardy júzege asyrý ónimniń ózindik qunyn tómendetýge, energııa tıimdiligin arttyrýǵa jáne kásiporynnyń óndiristik qýatyn keńeıtýge múmkindik beredi.
Buǵan qosa shıkizat bazasyn qamtamasyz etý, halyqaralyq ónerkásiptik kooperasııany damytý, eksporttyq áleýetti saqtaý jáne syrtqy naryqtarda tıtan ónimderiniń básekege qabilettiligin arttyrý máseleleri qaraldy.
Oljas Bektenov О́TMK-ni damytý Memleket basshysynyń óńdeý ónerkásibin nyǵaıtý, joǵary qaıta bólý ónimderin shyǵarý jáne Qazaqstandy jahandyq óndiristik tizbekterge engizý boıynsha qoıǵan mindetterine sáıkes keletinin atap ótti.
