Foto: úkimet
Sapardyń iskerlik baǵdarlamasynyń jalǵasy retinde Qanat Bozymbaev pen Djon Lı Gonkongtyń iri ınvestısııalyq qorlarynyń, qarjy ınstıtýttarynyń, tehnologııalyq kompanııalary men iskerlik qaýymdastyqtarynyń ókilderin biriktirgen Alatau City Roadshow ınvestısııalyq dóńgelek ústeline qatysty.
Qatysýshylardyń nazaryna Memleket basshysynyń tapsyrmasy boıynsha qurylyp jatqan jańa ekonomıkalyq ósý ortalyǵy – Alatau City-diń ınvestısııalyq áleýeti usynyldy. Sonymen qatar arnaıy quqyqtyq rejimniń múmkindikteri, ınvestorlardy memlekettik qoldaý sharalary, sondaı-aq qarjy, sıfrlyq tehnologııalar, jasandy ıntellekt, Web3-ındýstrııasy jáne ınnovasııalyq qalalyq ınfraqurylym salalaryndaǵy yntymaqtastyqtyń perspektıvalyq baǵyttary tanystyryldy.
Is-sharaǵa qatysýshylar aldynda sóz sóılegen Qanat Bozymbaev Qazaqstannyń Gonkongty Azııadaǵy jetekshi halyqaralyq qarjy ortalyqtarynyń biri jáne ınvestısııalar, tehnologııalar men quzyretterdi tartý úshin mańyzdy alań retinde qarastyratynyn atap ótti.
«Gonkong álemdik qarjy júıesinde erekshe oryn alady jáne halyqaralyq ınvestısııalar, kapıtaldy basqarý jáne transshekaralyq jobalardy júzege asyrý úshin negizgi alańdardyń biri bolyp qala beredi. Dál sondyqtan biz úshin Alataý jobasyn Gonkongtyń ınvestısııalyq jáne iskerlik qoǵamdastyǵyna tanystyrý mańyzdy. Qazaqstan tarıhynda alǵash ret túsinikti qaǵıdalarǵa, ınvestorlardyń quqyqtaryn qorǵaýǵa, sondaı-aq retteýdiń úzdik halyqaralyq standarttaryna basymdyq bere otyryp, Gonkongta qoldanylatyn tásildermen kóp jaǵdaıda úndes keletin arnaıy quqyqtyq rejimi bar qala qurylyp jatyr», dedi Q.Bozymbaev.
О́z kezeginde Gonkong ákimshiliginiń basshysy Djon Lı seriktestikti keńeıtýge múddeliligin atap ótip, eki taraptyń bıznes-qoǵamdastyqtary arasyndaǵy tikeleı baılanystardy damytýǵa qoldaý bildirdi.
Dóńgelek ústel aıasynda Alatau City Authority men sıfrlyq tehnologııalar jáne ınnovasııalar salalaryndaǵy jetekshi korporasııalar arasynda yntymaqtastyq týraly 6 kelisimshart pen memorandýmǵa qol qoıyldy.
