Oblystyq beıneleý óneri murjaıynda ótken kórmege sýretshiniń 24 týyndysy qoıyldy. Kórermen nazaryna usynylǵan kartınalardyń barlyǵy da sońǵy eki jyl ishinde dúnıege kelgen. Olardyń qamtyǵan taqyryby da san alýan: otbasynyń uıytqysy hám urpaqty jalǵastyrýshy áıel beınesi, halyqtardyń paıda bolýy men olardyń tarıhy, álemdik ańyzdar men mıfter...
Sýretshiniń barlyq týyndylarynyń astary fılosofııalyq mánge toly degendi aıtady ónertanýshylar. Avtordy tabıǵat, ǵarysh, ómir, din týraly tolǵamdar qatty qyzyqtyratyn bolsa kerek. Álbette, munyń tý syrtynda bir kartınany ómirge keltirý úshin júzdegen eksızdi synnan ótkizetin jankeshti eńbektiń turǵany aıtpasa da túsinikti.
Bul – Ǵaımoldınniń alǵashqy kórmesi emes. О́tken ǵasyrdyń 90-shy jyldary týyndylaryn jurt talqysyna shyǵarypty. Ol kezde qalada «Qaraǵandy avangardy» – «KarAvan» jastar toby bolǵan. Sonyń alǵashqy quramynda Erlan da bolǵan eken. Mine, endi ol araǵa talaı jyldy salyp, óziniń kórermenimen qaıyra qaýyshty.
Erlan Ǵaımoldın – Qaraǵandynyń týmasy. Almaty kórkemsýret ýchılıshesin bitirgen soń, týǵan qalasynda jarnama salasynda ter tókken. Odan keıin 80-jyldary Almatydaǵy memlekettik teatr-kórkemóner ınstıtýtyn (qazirgi T.Júrgenov atyndaǵy óner akademııasy) sándik-qoldanbaly óner sýretshisi mamandyǵy boıynsha támamdaǵan.
Ǵaımoldınniń shyǵarmashylyǵy týraly qaraǵandylyq ónertanýshylar óte jyly lebiz bildiredi. Mysaly, belgili maman Natalıa Ivanınanyń myna pikirine nazar salsaq. «Sýretshini 2000-jyldardyń basyndaǵy qazaqstandyq óner mektebiniń ókili dep senimmen aıtýǵa bolady. Onyń kartınalaryndaǵy keıipkerlerdiń, meıli ol adam nemese jan-janýar bolsyn, báriniń kóz janarlary mindetti túrde aıqyn kók túspen beriledi. Budan bireýler adamzattyń qushaq jetpes keńistigin ańǵarsa, endi bireýler túpsiz tereń, qap-qarańǵy shyńyraýdy kóredi. Ǵaımoldınniń ǵajaıyp áleminiń syry da osynda bolsa kerek», deıdi maman.
Qaırat ÁBILDA,
«Egemen Qazaqstan»
QARAǴANDY
Sýretterdi túsirgen Dmıtrıı KÝZMIChEV
