Osynaý jahandyq ózekti máselemen oraılas, bıylǵy Joldaýda Memleket basshysy jastardyń reprodýktıvti densaýlyǵyn qorǵaýǵa jáne nyǵaıtýǵa erekshe nazar aýdarý kerektigin bóle-jara ataǵany aıan. Kókeıkesti máselege oraı, Almatydaǵy Pedıatrııa jáne balalar hırýrgııasy ǵylymı ortalyǵy Elbasynyń bıylǵy Joldaýyn talqylady. Jıynǵa S.Asfendııarov atyndaǵy Qazaq Ulttyq medısınalyq ýnıversıtetiniń balalar aýrýlary kafedrasynyń oqytýshylary da ortaqtasty. Pedıatrııa ortalyǵynyń dırektory Rıza Boranbaeva Joldaýdaǵy ásirese, jasóspirimderdiń densaýlyǵyn qorǵaýǵa erekshe nazar aýdarý qajettigi, halyqtyń uzaq jasaýy medısınalyq tehnologııalardyń damýy men sapaly medısınalyq qyzmet kórsetýge baılanysty ekeni aıtylǵanyn alǵa tarta kele, aldaǵy mindetter týraly tarata sóz qozǵady.
– Memleket basshysy onkologııalyq aýrýlarmen kúresý úshin keshendi jospar qabyldap, ǵylymı onkologııalyq ortalyq qurý qajettigin tapsyrdy. «Halyqaralyq ozyq tájirıbe negizinde aýrýdy erte dıagnostıkalaýdyń jáne qaterli isikti emdeýdiń joǵary tıimdiligi qamtamasyz etilýge tıis», dedi. Bul rette Pedıatrııa ortalyǵynda maqsatty jumystar júrgizilýde. Sońǵy jyldary balalardaǵy onkologııalyq aýrýlardy emdeýdiń jańa baǵdarlamasyn engizýdiń arqasynda aýyr dertke shaldyqqan balalardyń ómirin uzartýǵa qol jetkizdik. Birneshe jyl ishinde balalar ólimi eki esege azaıdy. Bizdiń ortalyqta jasalatyn jáne basqa esh jerde júrgizilmeıtin biregeı dıagnostıkalyq zertteý ádisterin atqaratyn klınıkalyq-dıagnostıkalyq zerthanamyz bar. Aldaǵy ýaqytta bul baǵyttaǵy jumystar Elbasy tapsyrmasyna sáıkes jalǵasyn tabatyn bolady», dedi R.Boranbaeva.
Pedıatrııa ortalyǵy qazirgi ýaqytta densaýlyq salasyn sıfrlandyrý men qyzmet kórsetýdi ońtaılandyrý boıynsha medısınalyq aqparattyq júıeni engize bastady.
Aınash ESALI,
«Egemen Qazaqstan»
ALMATY
