Kenshiler komandasynyń tizginin ustaǵan 31 jastaǵy Álibek Orazǵalıevtiń esimi fýtbol salasyna úsh qaınasa sorpasy qosylmaıdy deıtin-aq maman. О́miri dop teýip kórmegen, bul salada qandaı da bir qyzmet atqarmaǵan. Biraq oblystyq deneshynyqtyrý jáne sport basqarmasynyń basshysy Natalıa Sýhorýkovanyń aıtýynsha, Álibek Sákenuly qany jerge tambaıtyn qarjyger eken. «Qarjyny baqylaý – dál qazirgi ýaqytta biz úshin sońǵy is emes», deıdi ol. Iаǵnı Sýhorýkova hanymdy «Shahterdiń» aldaǵy maýsymdaǵy shabysy men tabysy emes, ujymnyń tıyn-tebendi únemdep jaratqany kóbirek tolǵandyratyn sııaqty.
«Shahterdiń» bıylǵy bıýdjeti 2 mlrd teńgeni quraıdy. Basqa amal joq, klýb osy qarjyǵa ildebaılap kún kórýi qajet. Tipti Sýhorýkova hanym komandanyń aldyna aqsha tabýdy úırený kerek degen mindet qoıyp otyr. Byltyr joǵary toptan «ushyp» kete jazdap, áýpirimmen aman qalǵan, bıyldyń ózinde shalajansar jany bar «Shahter» ony qaıdan, qalaı tabatynyn jergilikti sporttyń basshysy bilmese, ózge jurtqa beımálim...
Iá, kezinde «Shahter» qatarynan eki dúrkin el chempıony bolyp, Eýropa kýboktarynda tabysty óner kórsetkende bıýdjetten aıanbaı bólingen kól-kósir aqshanyń astynda qaldy. Qarny toq, kıimi kók bolǵan soń fýtbolshylar da aıanbaı oınady, «Shahterdiń» quramynda óner kórsetýge myqty degen legıonerlerdiń ózi qulshynyp turdy. Bir ókinishtisi, sol kezderi aqshany ońdy-soldy shashqan basshylar ustanǵan teris saıasattyń kesirinen komanda áli kúnge deıin qarjylyq máselesin ońalta almaı keledi.
Endi «Shahterdiń» bas bapkerligine kelgen Belarýs mamany týraly az-kem aıtsaq. Obaly neshik, jańa jattyqtyrýshynyń oıynshy hám bapker retindegi ótkenine qarap otyrsaq, birtalaı belesti baǵyndyrǵan eken. Vladımır Jýravel 1989 jyldan 2005 jylǵa deıin jasyl alańda qorǵaýshy retinde dop tepken. «Dınamo» (Erevan), «Hapoel» (Ierýsalım), «Dınamo» (Mınsk) jáne «Jemchýjına» (Sochı) syndy komandalar sapynda óner kórsetipti. Qol jetkizgen tabysy da az emes: Belarýs eliniń birneshe dúrkin chempıony, el kýbogynyń ıegeri jáne Izraıl kýbogynyń fınalısi. Bapkerlik qyzmetti 2005 jyly ÝEFA-nyń jattyqtyrýshylyq lısenzııasyn «Pro» dárejesi boıynsha alǵannan keıin Belarýs komandalarynda bastaǵan.
2010 jyldan 2014 jylǵa deıin Kıshınevtiń «Dachııa» komandasyn jattyqtyryp, el chempıonatynda birneshe dúrkin kúmis júlde aldy. Byltyrǵy maýsymda «Dınamomen» (Brest) birge Belarýs chempıonatynda «Úlken úshtikti» (BATE, «Dınamo» (Mınsk), «Shahter») ǵana alǵa jiberip, týrnır qorytyndysynda tórtinshi orynǵa taban tiregen. Buǵan qosa komanda 10 jyl úzilisten keıin el kýbogyn jeńip alyp, Brest qalasyna syıǵa tartty.
Qazirgi tańda Túrkııada oqý-jattyǵý jıynynda júrgen «Shahterdiń» quramyna jergilikti 12 fýtbolshy engen. Al legıonerlerdiń taǵdyry áli belgisiz. «Muny aqsha sheshedi. Kim olarǵa jaqsy jaǵdaı usynady, olar sol jaqqa tartady. Sondyqtan byltyr komandanyń negizgi quramyn jasaqtaǵan oıynshylardy bıyl alańnan kórmeıtin bolamyz. Máselen, Iýlıýs Szoke men Marko Stanoevıch komandamen qosh aıtysty», deıdi bas jattyqtyrýshy.
Aldaǵy ýaqytta komanda quramyna shaqyrylatyn legıonerlerdi jattyqtyrýshylar shtaby sheshpek. Jattyqtyrýshylar demekshi, Jýravel Belarýs elinen jalǵyz ózi keldi. Oǵan ótken maýsymda komandada jattyqtyrýshylyq qyzmet atqarǵan Andreı Fınonchenko men Igor Soloshenko kómektesetin bolady.
Qaırat ÁBILDA,
«Egemen Qazaqstan»
Qaraǵandy oblysy
