Oblysta Azııa keńistiginde balamasy joq biregeı, úzdik tehnologııalar qatary shoǵyrlanǵan gematologııalyq ortalyqtyń jobalaý jumysy aıaqtalý ústinde. Aımaq basshysy Danıal Ahmetovtiń bastamasymen aldaǵy tańda Semeıde de alǵashqy polıtravma jáne ortopedııa ortalyǵy ashylatyn boldy.
– Semeıde medısınalyq jedel járdem aýrýhanasynyń negizinde ashylatyn jańa polıtravma jáne ortopedııa ortalyǵy respýblıkalyq travmatologııa jáne ortopedııa ǵylymı-zertteý ortalyǵynyń jetekshi mamandarymen birge ishki protezdeý jáne kúrdeli jaraqattardy emdeý úshin eń ozyq tehnologııalardy engizýge múmkindik beredi, – dedi oblystyq densaýlyq saqtaý basqarmasynyń basshysy Marat Shoranov, – Bul jerde Semeıdegi jedel medısınalyq járdem aýrýhanasynyń róli óte mańyzdy, sebebi bul aýrýhana Shyǵys Qazaqstan oblysynyń 9 aýdanyna qyzmet etedi.
Oblys ákiminiń baspasóz qyzmetinen habarlaǵandaı, medısınalyq jedel járdem aýrýhanasynda qazirgi tańda mýltımedıalyq quraldarmen jabdyqtalǵan ota jasaý bólimi, ınsýlt ortalyǵy, naýqastardy erte qalpyna keltirý zaly qyzmet etedi. Budan bólek fızıoterapııa bólimi, jańa quraldarmen jabdyqtalǵan eki birdeı gımnastıka bólmesi de bar. Munda sondaı-aq halyqaralyq standarttarǵa sáıkes naýqastardyń óz syrqattaryn basqarýǵa úıretetin túrli mektepter jumys jasaıdy. Al aýrýhana mamandary jyl saıyn shetelde biliktilikterin kóterip, arnaıy kýrstardan ótedi. Bul rette aımaq basshysy arnaıy oblystyq baǵdarlamanyń arqasynda óńirdiń densaýlyq saqtaý salasy tolyq jetildirilip, jańarýdan ótetinin aıtady.
– Densaýlyq saqtaý salasyn damytýdyń negizgi elementteri medısına qyzmetkerlerin únemi daıyndaý, álemdik medısınalyq standarttardy qatań saqtaý bolyp tabylady. Kelesi jyly oblystyń barlyq medısınalyq mekemeleri orta deńgeıdegi álemdik jabdyqtarmen qamtylatyn bolady. Osylaısha, bes jyldyń ishinde óńir medısınasynyń básekege qabilettiligi birneshe ese artatynyna tolyq senimdimin. Budan bólek, «Rýhanı jańǵyrý» baǵdarlamasy aıasynda dástúrli qazaq medısınasy ortalyǵyn ashamyz. Men halyq medısınasy jaqsy damyǵan Qytaıda bolyp qaıttym. О́tkendi umytpaýymyz kerek. Babalar murasyn, olardyń tájirıbelerin keńinen qoldansaq, utarymyz kóp bolmaq, – dedi D.Ahmetov.
Raýshan NUǴMANBEK,
jýrnalıst
Semeı
