Oıyn jaıly azdy-kem sholý jasap ótsek. Eki komandanyń deńgeıi eki túrli. Biri Eýropa lıgasynyń toptyq kezeńinen shyǵyp, tuńǵysh ret pleı-offqa ótti. Ekinshisi, Chempıondar lıgasynyń tobynan shyǵa almaı, úshinshi orynmen Eýropa lıgasyna jol tartty. Portýgalııalyq baspasózdi qarap otyrsaq, «Sportıng» úshin bul bir qyzyqty kezdesý bolmaq eken. Sebebi, bul komanda Qazaqstannyń komandalarymen birinshi ret kezdeskeli tur. Ekinshi jaǵynan «Sportıng» Eýrokýboktarda munshama alysqa barmaǵan. Lıssabon men Astananyń arasy 6000 shaqyrymnan asady.
Al «Astana» «Sportıngtiń» ejelgi qarsylasy «Benfıkamen» chempıondar lıgasynda ushyrasqan. Portýgalııada 2:0 jeńilip, óz alańynda 2:2 teń tarqasty. О́z alańynda 17 match boıy jeńilip kórmegen elordalyqtar endi taǵy bir jańa serııany bastaýǵa daıyn sekildi. Otandyq klýbqa osy joly elordanyń aıazy, jasandy alańy, uzaq ýaqyt jol júrgen qarsylastyń sharshańqy qalpy – barlyǵy da jaqsy áser etýi tıis. Onyń ústine statıstıkaǵa súıenetin bolsaq «Astana» eýrokýboktaǵy sońǵy 8 oıynda 18 gol soqqan. Iаǵnı, match saıyn ortasha eseppen alǵanda 2,25 gol.
Úshinshi jyl qatarynan eýrokýbokta óner kórsetip kele jatqan «Astana» osy matchtyń qarsańynda úsh oıynshy aldy. Olar: Baqtıer Zaınýtdınov, Iýrıı Persýh jáne Marko Stanoevıch. Biraq, bir ókinishtisi komanda negizgi shabýylshysy Djýnıor Kabanangany Saýd Arabııanyń «Ál-Nasyr» komandasyna 2 mıllıon eýroǵa satyp jiberdi. Sonymen qatar, ótken jyly «Slavııaǵa» qarsy oıynda sary qaǵaz alǵan Serikjan Mujyqov osy matchqa qatyspaıdy.
Endi qarsylas jaıly qozǵasaq, «Sportıng» sońǵy 9 maýsymda 7-ret Eýropa lıgasynda oınaǵaly tur. Komanda osy jaqynda ǵana Fredı Montero, Braıan Rýıs sekildi tanymal fýtbolshylardy satyp aldy. Alaıda, negizgi shabýylshysy Bast Dost jaraqat alyp qalypty. Sońǵy málimet boıynsha nıderlandylyq shabýylshy alǵashqy matchta alańǵa shyqpaıdy eken. «Sportıng» qaqpashysy Rýı Patrısıý 30-ǵa tolyp, elordada orda buzbaqshy. 15-aqpan kúngi týǵan kúnin ol matchtan keıin qandaı kóńilmen toılaıtyny kezdesýdiń nátıjesine baılanysty bolar. Aıtpaqshy, bul qaqpashy 2016jylǵy EÝROda Portýgalııa quramasymen qurlyq chempıony atanǵanyn da umytpaıyq.
«Sportıngke» baılanysty statıstıkany aıta ketetin bolsaq, bul komanda eýrokýboktegi syrtta ótkizgen sońǵy 8 matchynyń 6-aýynda jeńilis taýypty. Osyndaı málimetterden keıin árıne, elordalyq «Astana» óz alańynda jeńilmeýi tıis dep sanaımyz. Degenmen, fýtboldaǵy qaǵıda «alań tegis, dop domalaq» degen sózdi de esten shyǵarmaımyz.
Ermuhamed MÁÝLEN,
«Egemen Qazaqstan»
