Rasynda da osy ýaqytqa deıin tarazdyqtar jaz mezgilinde serýendep júretin, bolmasa qonaq kelgende aparyp kórsetetin demalys oryndarynyń tapshylyǵy týraly talaı másele kóterip kelgen. Máselen Baýyrjan Momyshuly atyndaǵy «Jeńis» saıabaǵyna halyq kóp shoǵyrlanatyndyqtan, bul jerdi jańǵyrtý kerektigi de sóz bolǵan. Endi atalǵan saıabaq qaıta jańǵyrtylyp, jańalanatyn bolady. Jıynda saıabaqty jańǵyrtý jobasymen Almaty qalasynan arnaıy kelgen «Arystan – Servıs» jaýapkershiligi shekteýli seriktestigi tanystyrdy. Joba avtorlarynyń aıtýynsha, munda Uly Otan jáne aýǵan soǵysy ardagerlerine, sondaı-aq tyl eńbekkerlerine arnalǵan mýzeı boı kóteretin bolady. Sondaı-aq, Uly Otan soǵysyna qatysqan 68 myń jambyldyqtardyń esimi jazylǵan «Jaýyngerlik dańq alleıasy» memorıaldy kompozısııasy da salynady. Sonymen qatar, erlikpen qazaq tapqan jambyldyq jaýyngerler týraly tyń derekter izdestirilip, olar jergilikti baspasóz betterinde jarııalanady.
Saıabaq aýmaǵynda Jeńis kúnine oraı «Máńgilik polktiń» júrýine de basymdyq berilip, qalanyń ár jerinde ornalasqan «Máńgilik alaý» men Baýyrjan Momyshuly eskertkishi saıabaq aýmaǵyna ákelinedi. Bul oraıda Uly Otan soǵysynyń ardageri, jazýshy Baýyrjan Momyshulynyń urpaq tárbıesine qatysty aıtqan naqyl sózderi jazylǵan taqtaıshalar ornatylady. Sonymen qatar, qaýipsizdikti saqtaý maqsatynda saıaqat aýmaǵyna tolyqtaı beınabaqylaýlar qoıyp, qosymsha polısııa pýnktterin ashý josparda bar.
Keleshekte Taraz qalasyndaǵy Baýyrjan Momyshuly atyndaǵy «Jeńis» saıabaǵy jastardy otansúıgishtikke tárbıeleıtin, tarıhty tanýǵa úndeıtin saıabaq bolmaq.
Hamıt Esaman,
«Egemen Qazaqstan»
Jambyl oblysy
