Sportty janyna serik etken kóziqaraqty oqyrmandarymyz bul rásimniń qaı qalada jáne qaı ýaqytta túsirilgenin jatqa bilýi kerek. Iá, durys aıtasyz! Sýret 2015 jyly elorda tórinde dúrkirep ótken dzıýdo sportynan álem chempıonatynda túsirilgen bolatyn.
Dúnıe júziniń 120 elinen kelgen 700-den asa dzıýdo sheberleri Astanada baq synaǵan birinshiliktiń alǵashqy kúninde-aq kútpegen jaǵdaı boldy. Árıne, sport mamandary úshin bul kútilgen jaǵdaı bolýy múmkin, biraq jankúıerler úshin bul bir kútpegen oqıǵa, tipti tosyn syı boldy. Astanadaǵy aıtýly alamanda synǵa túsip jatqan qazaqtyń eki balasy tarıhta tuńǵysh ret álem chempıonatynyń fınalynda kúresip, júldeli birinshi jáne ekinshi oryndy bólisti.
Olar – 60 kıloda beldesken Eldos Smetov pen Rýstam Ibraev edi. Teń deńgeıde ótken kezdesýde Smetov qarsylasyn bir shıdomen jeńip, altyn medalǵa ıe bolsa, Rýstam Ibraev kúmis júldeni qanaǵat tutqan. Sóz joq, sol kún elimizdiń sporttyq kúntizbesinde altyn árippen jazylǵany anyq. О́ıtkeni buǵan deıingi álem nemese basqa da iri halyqaralyq jarystarda elimizdiń eki sportshysy fınalda bir-birine qarsylas atanyp, júldege talaspaǵan. Bul eki qazaq oǵlanynyń bir tuǵyrda altyn men kúmis júldeni bólisip, qýanyshtan kózderine jas alǵan tarıhı sáti edi.
Tarıhı sýretti túsirgen elimizge tanymal fotosýretshi – Jeńis Ysqabaı. Ol ózi túsirgen sýretterdiń ishindegi eń qundy dúnıemniń biri osy sýret dep esepteıdi. Sondaı-aq dzıýdo sportynyń tarıhyna qanyq Jeńis bul sýretiniń tarıhı sýret bolatynyn sol kezde ózinshe joramaldaǵanyn da aıtady. «Negizi ár sýretimniń ózine laıyq qundylyǵy, ózine laıyq erekshe tarıhy bar ǵoı. Biraq, dál osy sýret men úshin emes, elimiz úshin óte qundy. О́ıtkeni bul álem chempıonatynyń tuǵyrynda ıyq tiresip turǵan eki qazaqtyń tuńǵysh sýreti», deıdi ol.
Ras, bul sýret elimiz úshin óte qundy hám mýzeı tórinen oryn alatyn tarıhı jádiger. Dál mundaı jaǵdaı elimizdiń sport tarıhyndaǵy jaqyn 10-15 jyldyqta qaıtalana ma, joq pa, onysy bizge beımálim. Degenmen, sańlaqtarymyz jeńis tuǵyrynda qaz-qatar jarqyrap turatyn sátter jıi bolsyn deımiz.
Álı BITО́RE,
«Egemen Qazaqstan»
Sýretti túsirgen Jeńis YSQABAI
