Degenmen, Alǵys aıtý kúniniń aıtýly jańalyǵy – Oral qalasynda múmkindigi shekteýli jandarǵa arnalǵan erekshe úıdiń salynatyndyǵy týraly habar boldy.
Tolyqtaı mesenattardyń ǵana kúshimen turǵyzylatyn eki qabatty keshende múgedek jandardyń barlyq talap-suranysy eskeriletin bolady. Jobalyq quny 100 mln. teńgege baǵalanǵan bul keshende múgedek jandardy saýyqtyrý, ómirge beıimdeý jumystary júrgizilmek. Taǵdyrdyń qıyn synaǵyna tap bolǵan adamdar bul jerde tolyqqandy ómir súrýdi úırenedi: jańa mamandyq alady, ortamen aralasady, ózine ózi qyzmet kórsetedi, tamaq pisirip, kir jýyp, sharýashylyǵyn júrgizedi. Bos ýaqytyn tıimdi paıdalanyp, demalysyn mándi ótkizýge daǵdylanady. Ádette óz qıyndyǵymen ońasha qalyp qoıatyn múgedek jandar bul jerde jańa ómir bastaıtyny sózsiz.
Bul «Rýhanı jańǵyrý» baǵdarlamasy aıasynda jasalyp jatqan shara. «Týǵan jer» bastamasy boıynsha tolyǵymen jergilikti demeýshilerdiń kúshimen turǵyzylady. Qazir tıisti qujattamalar rásimdelip jatyr, qurylys jumysy osy kóktemde bastalady. Biraq biz búgingi 1 naýryz – Alǵys aıtý kúnine oraılastyryp, qurylys irgetasyna «Estelik kapsýlasyn» salyp otyrmyz. Munyń tereń maǵynasy bar, - deıdi Batys Qazaqstan oblysynyń ákimi Altaı Kólginov.
Múgedekterdi ómirge beıimdeý úıi – Batys Qazaqstan oblysyndaǵy tuńǵysh joba. 50 adamǵa arnalǵan keshende jeke-jeke jatyn bólmeleri, as úı, medısınalyq kabınet jəne sheberhana jobalanǵan.
Qazbek QUTTYMURATULY
«Egemen Qazaqstan»
Sýretti túsirgen Temirbolat TOQMÁMBETOV
Oral qalasy
