Prezıdenttiń «Altyn sapa» syılyǵyn ıelenýge arnalǵan baıqaýǵa jáne «Qazaqstannyń úzdik taýary» respýblıkalyq kórme-baıqaýyna ótinim qabyldaý bastaldy. Bıyl «Altyn sapa» baıqaýynyń uıymdastyrylýynda birqatar ózgerister bar. Jeńimpazdarǵa alǵash ret 450 AEK, ıaǵnı 1 mln 82 myń teńge kóleminde aqshalaı syılyq tabystalatyn boldy. Kásipkerler utyp alǵan qarajattan qalaýlaryna qaraı halyqaralyq sapa baıqaýlaryna, onyń ishinde Táýelsiz Memleketter Dostastyǵynyń óndirýshileri arasynda ónim men qyzmet kórsetý sapasynyń úzdigi baıqaýyna qatysý shyǵynyn óteı alady.
«Altyn sapa» baıqaýynda aýylsharýashylyq ónimderin óndirýshilerge arnalǵan atalym men «Úzdik ındýstrııalyq joba», «Úzdik ınnovasııalyq joba» arnaıy syılyqtary bekitildi. Osylaısha, bıyl otandyq 14 kompanııa «Altyn sapa» jeńimpazy atana alady.
– Almaty qalasynyń óndirýshileri ádette «Altyn sapa» baıqaýynda birneshe júldeli oryndy ıelenedi. Bizdiń qalada bıznes aıtarlyqtaı damyǵan, tıisinshe otandyq naryqta kóshbasshy bolyp, tipti úzdik eksporttaýshy atanǵan tanymal kompanııalar da kóp, – deıdi Almaty qalasy Kásipkerler palatasynyń sarapshysy Lıýbov Alekseeva.
«Altyn sapa» baıqaýyna zańdy tulǵalar da, jeke kásipkerler de qatysa alady. Baıqaýdy uıymdastyrýshylar atalym men sanatty tańdaýda shataspaýǵa keńes berip otyr.
– Ár atalymda sanat boıynsha úsh syılyq bar: shaǵyn, orta jáne iri bıznes. «О́ndiristik maqsattaǵy úzdik kásiporyn» atalymynda shaǵyn bıznes sýbektisi múldem joq. Orta men shaǵyn arasyn tańdaı otyryp, ózińdi shaǵyn bızneske jatqyzǵan jón. Al halyqqa arnalǵan taýarlar sektorynda shaǵyn bıznes ókilderi óte kóp. Munda sapa menedjmentiniń júıesi bolǵanyna asa mán beriledi, – dedi «Atameken» UKP Shaǵyn jáne orta bıznesti damytý departamenti dırektorynyń orynbasary Saltanat Ábdikárimova.
S.Ábdikárimovanyń aıtýynsha, baıqaýda jeke patentti ıelený, túrli noý-haý daıyndaý, halyqaralyq kórme men baıqaýǵa qatysý ári jeńimpaz atanýǵa basymdyq beriledi.
Aınash ESALI,
«Egemen Qazaqstan»
ALMATY
