О́tken jyldyń qyrkúıek aıynan bastap mektepterde «Kundelik.kz» elektrondy kúndelik jáne jýrnaldar júıesi engizilgen. Bul júıe muǵalimderge elektrondy formatta jýrnal toltyrýǵa múmkindik týdyrsa, ata-analar qaýymy úshin balasynyń úlgerimin onlaın rejimde qashyqtyqtan-aq qadaǵalaýǵa jol ashqan. Mamandar júıe jumysyn bastaǵaly beri oqýshylardyń úlgerim sapasy men tártibinde oń ózgerister baıqalǵanyn aıtady.
Mektepter men mektepten tys uıymdarda iske qosylǵan robot-tehnıka jáne 3D modeldeý úıirmeleri 2692 oqýshyny qamtyǵan. Bıyl Oqýshylar saraıy bazasynda balalar men jasóspirimder kúshimen ınnovasııalyq bıznes jobalardy engizýge arnalǵan bıznes-ınkýbator qurylmaq. Almaty qalalyq bilim basqarmasynyń basshysy Gúlnar Hodjabergenovanyń aıtýynsha, bul balalardyń erte jastan zertteýshilik daǵdysyn qalyptastyrýǵa jáne mektep bitirýshilerdiń bolashaqta álemdik básekelestik ortada laıyqty oryn alýlaryna múmkindik bermek. Pedagogtardyń biliktiligin arttyrý men mártebesin kóterý árdaıym basty nazarda degen qalanyń bas muǵalimi osy baǵytta qolǵa alynǵan birqatar sharýalardy jipke tizip berdi.
– Orta bilim berý deńgeıinde jańartylǵan mazmundy bilim berýge kezeńdep ótý belgilendi jáne bul 2020 jyly aıaqtalady. Osy rette jańartylǵan mazmundy bilim berýge 2016 jyly 1-shi synyptar, 2017 jyly 2, 5, 7-shi synyptar ótti. Osy jyly kezeńdep ótý isi 3, 6, 8-shi synyptardy qamtysa, 2019 jyly, 9, 10-shy synyptar, 2020 jyly 11-shi synyptar jańa mazmundy bilim berýge tolyqtaı ótedi. Elbasy halyqqa Joldaýynda atap kórsetkendeı, jańa mazmundy bilim berý júıesine ótken muǵalimderdiń jalaqysy 30 paıyzǵa ósedi. Sanaty men eńbek ótili joq jas muǵalimderge 18 696 teńge, joǵary sanatty muǵalimderge 27 myń teńgeden asa ústemaqy qosylady. Jańartylǵan mazmunda bilim berý boıynsha 2016 jyly 1-shi synyptyń 2786 muǵalimi, 2017 jyly 2,5,7-shi synyptardyń 3846 muǵalimi kýrstan ótkizildi. Bıylǵy jyly bilim basqarmasynyń jáne bilim berý uıymdarynyń saıttaryna qaladaǵy úzdik muǵalimderdiń beınesabaqtaryn ornalastyrý boıynsha jumystar bastaldy. Bilim berý júıesiniń tıimdilik kórsetkishiniń mańyzy onyń nátıjeliliginde, – deıdi G.Hodjabergenova.
Almaty qalasynyń bilim berý júıesinde 1078 bilim berý uıymy jumys istese sonyń 700-i mektepke deıingi bilim berý uıymy. Máselen sońǵy eki jyldyń ózinde qalada 10,4 myń adamǵa arnalǵan 262 mektepke deıingi mekeme ashylǵan. Mektepke deıingi bilim berýmen jáne tárbıeleýmen 3 jastan 6 jasqa deıingi balalardyń balalardyń 81,2 paıyzy qamtylǵan. 296 mektepke deıingi uıymnyń bazasynda 13 712 orynǵa memlekettik bilim berý tapsyrysy ornalastyrylǵan. Jalpy, qaladaǵy orta bilim berý uıymdarynda 243 348 oqýshy bilim alady. Jýyrda ǵana halyq aldynda esep bergen shahar basshysy jastardyń jaqsy bilim alýyna laıyqty kóńil bólinetinin tilge tıek etken edi. Bul rette oqýshylardyń sapaly bilim alýy úshin muǵalimderge qoıylatyn talap ta kúsheıtilmek.
Arman OKTIаBR,
«Egemen Qazaqstan»
ALMATY
