О́zgesheligi sol, múmkindigi shekteýli balalar bul kúni qaladaǵy Shalqar Muhamǵalıev, Vlad Loskýtov sekildi ánshi jastarmen birge án shyrqap, bı bıledi. Ásirese Aızar Aıdostyń qolarbada otyryp oryndaǵan «Qaıter edik ómirge kelmegende» ánin aıtqandaǵy muńdy daýysy zaldaǵy jurtshylyqtyń kózine jas úıirdi. Mádenı shara aıaqtalǵannan keıin «Úlbi» múmkindigi shekteýli balalar ortalyǵynyń tárbıelenýshisi, serebraldy sal aýrýymen aýyratyn balǵyn Rollan Symbatov sahnaǵa shaqyrylyp, oǵan osy ýnıversıtettiń túlegi, jeke kásipker Mıras Saınoldın kómek retinde 200 myń teńgeni tabys etti.
«Nurly júrek» qaıyrymdylyq klýbynyń jetekshisi, oqý ornynyń sáýlet fakýltetiniń 3-kýrs stýdenti Nurgúl Bazylqyzynyń aıtýynsha, Rollan emdelý úshin jaqynda Qytaı eline barmaq. Onda baryp, tek tirkelý úshin ǵana 2,5 mıllıon teńge kerek. «Byltyr «Nurly júrektiń» músheleri Rollannyń óz elimizde emdelýine 500 myń teńge qarjy jınap bergen bolatyn. Al 2,5 mıllıon teńge sáýir aıyna deıin jınalýǵa tıis. Odan keıin qansha ret shaqyrady, qansha qarjy jumsalady. Ol jaǵy ázirge belgisiz», – deıdi Nurgúl.
Reti kelgende aıta keteıik, «Nurly júrek» qaıyrymdylyq klýby osydan týra bir jyl buryn jumysyn bastapty. Klýb músheleriniń barlyǵy da – osy ýnıversıtettiń belsendi stýdentteri. Elýge jýyq múshesi bar klýb múmkindigi shekteýli, ata-ana qamqorlyǵynsyz qalǵan balalar men áleýmettik turǵydan az qamtylǵan otbasylarǵa kómek kórsetý maqsatynda qurylypty. Osy sharaǵa Aızar Aıdos esimdi múmkindigi shekteýli balanyń ájesi Marjan Shábıeva arnaıy kelipti. «Meniń nemerem júre almaıdy. Arbaǵa tańylǵan. Myna stýdentterge myń alǵys. Kelip, jaǵdaıymyzdy bilip, syılyqtaryn ákelip turady», dep rızashylyǵyn jetkizdi. Kesh sońynda «Úmit» balalar úıi, «Úlbi» múmkindigi shekteýli balalar ortalyǵy men «Aqnıet» ınternatynyń 130 tárbıelenýshisine syılyqtar tabys etildi.
Azamat QASYM,
«Egemen Qazaqstan»
О́SKEMEN
