Elimizdiń kóptegen tennıs ortalyqtarynda osy sportqa aıaq basqan búldirshinderge arnalǵan sheberlik synyptary ótip, olardyń ata-analaryna arnalǵan syı-syıapattar tabystaldy. Elimizde tennıs sporty qarqyndy damyp kele jatqan Almaty, Aqtóbe, Shymkent, Oral qalalarynda túrli merekelik jıyndar uıymdastyryldy. 2013 jyly Halyqaralyq tennıs federasııasy bekitken mereke bul joly «Tennıs 10» baǵdarlamasynyń aıasynda atap ótildi. Iаǵnı, úlken tennıske endi aıaq basqan, 10 jasqa deıingi búldirshinder arasynda túrli saıystar jasalyndy. Júzden astam jetkinshekke tennıs taıaqshalary tabystalyp, kóptegen syılyqtar taratyldy. Osyndaı merekeniń biri elordadaǵy «Dáýlet» ulttyq tennıs ortalyǵynda da boldy. Onda biz Qazaqstan tennıs federasııasynyń vıse-prezıdenti Dıas Dosqaraevty sózge tarttyq.
- Halyqaralyq tennıs kúni biz úshin óte mańyzdy. Osy sportty damytýdyń, nasıhattap qalýdyń taǵy bir múmkindigi desek artyq emes. Búgin jattyǵýlar ashyq túrde júrip jatyr. Balalarynyń qalaı jattyǵatynyn ata-analar da kórip otyr. Tennıske endi kelip jatqan elordalyq balalarǵa kóptegen syılyqtar jasadyq. Olardyń osy sportqa degen mahabbatyn odan ári asha túsýimiz kerek.
- Dıas Baýyrjanuly, elimizdegi tennıstiń damýyna baılanysty atqarylyp jatqan sharýalar óte kóp. Alaıda, jańadan ashylatyn tennıs ortalyqtary qashan boı kótermek. Bir suqbatyńyzda Astana men Petropavlsk qalalarynda tennıs ortalyǵy ashylady dep edińiz?
- Negizi Soltústik Qazaqstan oblysyndaǵy ortalyqtyń tehnıkalyq ashylýy bolyp qoıǵan. Ortalyq qazir jumys istep tur. Tek biz ony resmı túrde jazǵa qaraı ashyp, keń qoldanysqa qosamyz. Al Astanada «Jeruıyq-2» saıabaǵynyń ishinen ashylatyn tennıs ortalyǵynyń qurylysy osy jazda bastalady. Sonymen qatar, qazir qurylysy júrip jatqan Shymkenttegi tennıs ortalyǵyn da aıta keteıin. Ondaǵy keshen jaqyn arada paıdalanýǵa beriledi. Ortalyqta qonaqúı, basseın, kóptegen korttar bolady. Almatyda taǵy bir ortalyqtyń qurylysy aıaqtalyp, 9-aqpan kúni paıdalanýǵa berildi. Qazir onda bapkerler jumysqa kirisip, tennıske jazylǵan jetkinshekterdi qabyldap jatyr. Baramyn, qatysamyn degenderge esik ashyq. Meken-jaıy «Mamyr» yqshamaýdanynda. Endigi maqsat – Qaraǵandy, Aqtaý, Qostanaı qalalarynda ekinshi tennnıs ortalyqtaryn ashý. Negizi men atap ótken qalalardyń barlyǵynda tennıs ortalyqtary bar. Biraq, jattyqqysy keletin balalardyń sany tym kóp bolǵandyqtan, biz olardy bir ortalyqqa syıdyra almaı jatyrmyz. Búginde 7 myńnan astam jetkinshek tennıske jazylǵan. Odan bólek, áýesqoılardyń ózi qanshama?!
- Dıas myrza, jaqyn arada Qazaqstan qurama komandasy Horvatııaǵa qonaqqa barady. «Devıs» kýbogynda tegeýrindi qarsylasqa tap boldyńyzdar. Bul quramany jeńip, kelesi kezeńge ótýge múmkindik bar ma?
- Bizde bul oıynǵa úlken jospar bar. Bes ret shırek fınalǵa shyqtyq. Biraq, tarıhymyzda eshqashan jartylaı fınalǵa ótip kórmedik. Sondyqtan da, osy oıynda bar kúshimizdi kórsetýimiz kerek. Horvatııa quramasy Marın Chılıch, Borna Chorıch sekildi myqty tenıısshilerden jasaqtalǵan. Bes tennısshisiniń beseýi de TOP-50 qataryna kiredi. Juptasyp oınaıtyn tennısshileriniń ózi myqty. Bizge qıyn bolatyny anyq. 100 paıyz jeńemiz dep aıtýdan aýlaqpyn. Bir ózgesheligi bul joly biz Zagrebtiń qasyndaǵy Parajdın qalasyndaǵy qumdaýyt tósenishte óner kórsetemiz. Horvatııanyń eń myqty tennısshisi Marın Chılıch osy joly qurama sapynda oınaımyn dep aıtypty. Qazaqstan quramasy degen kezde barlyǵy eń myqty oıynshylaryn shaqyrtatyn bolǵan.
Basty maqsat el abyroıyn tómen túsirmeý. Onyń ústine Halyqaralyq tennıs federasııasy keler jyly úlken bir jobany qolǵa almaqshy. Bul jarystyń formatyn ózgertkeli jatyr. «Devıs» kýbogy endi Álem chempıonaty sekildi ótedi. Bir aptanyń ishinde 18 komanda top-topqa bólinip óner kórsetedi. Al sol kezde bizge tobymyzdan shyǵý qıyn bolady. Álemdik topta qalýdyń ózi ońaıǵa soqpaıyn dep tur. Demek, qazirden bastap álemdik reıtıngimizdi joǵarylata bergenimiz jón.
Ermuhamed MÁÝLEN,
«Egemen Qazaqstan»
