Jaqynda biz Iýlııanyń anasy Svetlana Gennadevnamen tildesken edik. Ol bylaı deıdi.
– Iýlııanyń ákesi Evgenıı Galyshev qyzy degende shyǵarda jany bólek bolatyn. Ekeýmiz de erkeletip ósirdik, betinen qaqpadyq. Múmkin, óz betinshe sheshim qabyldaý, alǵan betinen qaıtpaıtyn ójettik sábı kezinen qanyna sińgen bolar. Alty jasynda bı úıirmesine jazyldy. Ony unatpaǵan soń endi ǵana uıymdastyrylǵan frıstaıldyń mogýl túrine jazyldy. Bul asa qaýipti sport, taýdan tómen qaraı quldyraǵanda janymyzdy shúberekke túıetinbiz. «Balam frıstaıl qaýipti eken, basqa seksııaǵa jazyl» degenimizge qulaq aspady. Alǵashqy bapkeri Anna Kornysheva Iýlııaǵa mol tájirıbesin úıretti. Alaıda ol eki jyldan keıin otbasy jaǵdaıyna baılanysty Almanııaǵa qonys aýdardy. Iýlııanyń bolashaǵynan úmit kútken Anna daryndy balalarǵa arnalǵan sport mektebiniń bapkeri Vıktor Lemeshkoǵa (qazir frıstaıldyń mogýl túrinen elimizdiń bas jattyqtyrýshysy) qyzymyzdy tapsyryp ketti.
Qyzymyzdy ákesi ekeýmiz kezek-kezek jattyǵýlarǵa aparyp júrdik. Amal bar ma, otaǵasy qazir aramyzda joq, erterek qaıtys bolyp ketti. Al jattyǵatyn jeri jaqyn emes, edáýir shalǵaıda. Baryp-qaıtqanymyzǵa alty-jeti saǵat ýaqyt ketetin. Al sonda oqýy qaıda qalady? Sharshaǵan sátte «osy frıstaıldy qoısańshy» degende, bizge ala kózimen qarap, renjip, sóılespeı qoıatyn. Iýlııa alǵashqy jeńisine nebári 11 jasynda 2003 jyly Reseıdiń Sankt-Peterbýrg qalasynda ótken kórshi memlekettiń kýbogy jarysynda jetip, top jardy. Arada úsh jyldan keıin el birinshiliginde kúmis alqany ıelenip, sport sheberi normasyn oryndady. 2007 jyly Álem chempıonatyna qatysyp, sheberligin shyńdaı tústi. Budan keıin 2008 jyly Eýropanyń eki dúrkin chempıony atandy. Birlesip óner kórsetýde Álem chempıony atandy.
– Iýlııanyń armany frıstaıldan Olımpııa oıyndarynyń chempıony nemese júldeger ataný edi, – dep áńgimesin jalǵastyrdy Svetlana Gennadevna. – Kanadanyń Vankýver qalasynda ótken Aq Olımpııa oıyndarynda tómen qaraı syrǵyǵan kezde sál qatelik jibergen Iýlııa 11-oryndy qanaǵat tutty. Alaıda ol Sochıdegi Olımpıadaǵa qalaı da bir medal alamyn dep bardy. Jankúıerler Iýlııanyń baǵyn qazylardyń baılaǵanyn kózderimen kórdi. Ony jetinshi orynǵa syrǵytyp, sýper fınalǵa jibermeı qoıdy. Shynynda Iýlııanyń kem degende qola medaldy alatyny sózsiz edi. Sochıden kelgen soń ol frıstaıldy tastaımyn dep bulqan-talqan boldy. Desek te, ózi janyndaı jaqsy kóretin sportty, bapkerleri men áriptesterin qımady. Taǵy da jattyǵýlar, shetelderge saparlar jalǵasa beredi. Al Iýlııanyń sońǵy eki-úsh jylda ǵana Álem kýbogy kezeńderinde alǵan altyn, kúmis, qola medaldary jeterlik. Qysqy Azııa oıyndarynda, ótken jyly Almatyda jalaýyn kótergen stýdent-jastardyń ýnıversıadasynda altyn alqany ýystap alyp, Qazaqstannyń abyroıyn asqaqtatty. Qyzym bıyl qazan aıynda 26 jasqa tolady. Ras ol qatty sharshady. Biraq dál qazir frıstaıldy tastaımyn degen sózdi estigenim joq. Áli de bolsa el namysy úshin baıraqty jarystarǵa qatysýdy oılaıdy.
Iýlııa ne deıdi?
– Kindik qanym tamǵan ózender órnektegen О́skemenimdi qatty saǵynyp qalyppyn. Phenchhanda da dál osy sáttegideı tolqyǵan joqpyn desem artyq aıtqanym emes. Árıne jeńiske jetken kezdegi sátti qalaı umytaıyn. Siz birinshi bolyp meni quttyqtap, batańyzdy berdińiz, sýretke túsirip aldyńyz. Mádenıet jáne sport mınıstri Arystanbek Muhamedıuly men onyń orynbasary S.Musaıbekov ekeýi alaqanyna salyp álpeshtedi, júrekjardy ystyq lebizin bildirdi. Al Elsııar Qanaǵatov aǵamyzdyń kelesi Olımpıadada altyn alqa al degeni meni jigerlendirdi.
Marqum ákemdi eske aldym, ol anammen birge men sporttyń kúrdeli túrin tańdaǵan kezde, qoldady, rýh berdi. Maqsat bıik, endi tórt jyldan keıin Beıjińde ótetin Aq Olımpıadaǵa qatysyp, ómir boıy armandaǵan – altyn alqama qol jetkizsem deımin. Arman aldamasa kerek. Arman alda, jol uzaq, Iýlııa degen qyzdaryńyzdan aldaǵy ýaqytta da qýantatyn jańalyqtardy kúte berińizder, – dep Iýlııa Galysheva aǵynan jaryldy.
Ońdasyn ELÝBAI,
Qazaqstannyń qurmetti sport qaıratkeri
О́skemen
