Oblys ákiminiń baspasóz qyzmetiniń bergen málimetterine súıensek, ótken jyldyń qorytyndysy boıynsha aımaqta 105%-dyq ósimmen 270 myń tonna et óndirilgen, bul - respýblıkalyq úlestiń 15%-y. Nátıjesinde Shyǵys Qazaqstan elimiz boıynsha ekinshi orynda keledi. «Eń bastysy, básekelestikke bastar múmkindikterdi paıdalana otyryp, artyqshylyqtardy tıimdi qoldaný, – dedi ShQO ákimi Danıal Ahmetov turǵyndar aldyndaǵy esebinde. – Sondyqtan joǵary sapaly daıyn ónimder naryǵyna shyǵý úshin «Evrazııa AgroHoldıng» JShS avstralııalyq kompanııasymen tize qosyp, Aıagóz aýdanynda et óńdeıtin kombınat salý jumystary júrgizilýde. Budan bólek bizdiń taraptan nysanǵa 468 mln. teńgege barlyq qajetti ınfraqurylymy júrgizilip, jobalyq-smetalyq qujattamasy ázirlenip jatyr.
Sondaı-aq, «AgroPortal» JShS ırandyq kompanııanyń qatysýymen Semeıde et óńdeý kombınatynyń qurylysy boıynsha iri ınvestısııalyq joba júzege asyrylýǵa daıyn. Osy rette ótken jyldyń sońynda QR IDM Investısııalar komıteti men «AgroPortal» JShS arasynda ınvestısııalyq kelisimshartqa qol qoıylǵandyǵyn atap ótken jón.
Sonymen qatar Shyǵys Qazaqstanda halyqaralyq standarttar boıynsha aýyl sharýashylyǵy ónimderin suryptaýdyń búkil jıyntyǵyn júzege asyratyn zerthana ashylady. Aımaq basshysynyń aıtýynsha, «Qytaılyq standarttar boıynsha sertıfıkattaý – aspan asty eliniń naryǵyna aparatyn tóte jol».
«Biz úshin Qytaı naryǵy mańyzdy. Qazirgi kúni oblysta qazaqstandyq ónimderdi qytaılyq standart boıynsha sertıfıkattaý zerthanasyn qurý jumystary júrgizilýde. Osy másele boıynsha bıyl qańtarda Qytaı Halyq Respýblıkasynan bir top mamandar bizdiń oblysqa kelip qaıtty. Zerthanany ornalastyratyn ǵımarat daıyndalýda. Quny mıllıardtan astam teńge bolatyn qondyrǵyny jetkizý jumysyn qazan aıynda bastaımyz», – dedi aımaq basshysy.
Aıta ketý kerek, bul zerthana eldegi biregeı ortalyq bolmaq.
Azamat QASYM,
«Egemen Qazaqstan»
Shyǵys Qazaqstan oblysy
