Ol qazirgi santúrli saýalǵa júk bolyp, keıde júıkeni tozdyrǵan til mádenıetin zerttegen, zerdelegen ǵalym bolatyn. Til qudiretin, til kórkemdigin saralap, sóılegen sátte hám kórkem dúnıege qoldaný barysynda tildiń halyqtyq úlgisin buzbaý – ǵylymı jumysynyń negizgi arqaýy boldy. Sóz ustaǵan jyraýlar men jyrshylardyń, qalam terbegen qalamgerlerdiń murasyn tereń barlap, ana tilin qadir tutqan ǵalym sońyna mol mura qaldyrdy. Onyń negizgi baǵyty kórkem ádebıet tili men stılıstıka negizderine sıntaksıs máselelerine arnaldy. Ol til ǵylymymen birge jazýshylyqty da qatar alyp júrdi. Oı áleminen qanat qaǵyp, ómir kóshimen jarasym tapqan shyǵarmalary kópshiliktiń kóńilinen shyǵyp, oń baǵasyn aldy.
Aıtýly ǵalymnyń 80 jyldyǵyna oraı, «Serǵalıev sabaqtary-2018» aıasynda «Rýhanı jańǵyrý jáne til bilimi máseleleri» atty halyqaralyq ǵylymı-teorııalyq konferensııa elordadaǵy Eýrazııa ulttyq ýnıversıtetinde ótti. Konferensııany ýnıversıtettiń prorektory, professor Dıhan Qamzabekuly ashyp, ǵalymnyń ómir jolyna eńbekterine toqtalsa, professor Nurgeldi Ýálı sóz mádenıetine erekshe mán bergenin tilge tıek etti. Al fılologııa ǵylymdarynyń doktory Gúldarhan Smaǵulova akademık M.Serǵalıevtiń azamattyq jáne ǵalymdyq tulǵasyn týraly tolǵanyp professor Baǵdan Momynova qazaq tilindegi gıbrıd sózder boıynsha ǵalymnyń zertteýlerine úńildi. Professor Sherýbaı Qurmanbaıuly qazirgi BAQ tilindegi býdan ataýlarǵa qatysty baılamyn akademık taldaýlarymen ushtastyra otyryp, naqty mysaldarǵa júgindi. Sol sekildi professor Sarqyt Álisjan qazaq stılıstıkasynyń sardary týraly túıindi pikirin jetkizip, ustaz aldyndaǵy shákirttik qaryzy men paryzy týraly oı terbedi. Al akademıktiń jary Záýresh Serǵalıeva konferensııany uıymdastyrǵan azamattarǵa alǵysyn bildirdi.
Alqaly basqosý seksııalarda jalǵasyp, akademıktiń Oqý-zerthanasynda qorytyndylandy.
Súleımen MÁMET,
«Egemen Qazaqstan»
