– Qunan báıgege 11, alaman báıgege 26 at qosyldy. Kóktemniń belgisi bilinip qalǵanymen, kóbesi endi buzylyp jatqan appaq qardyń ústinde báıge qosý, kókpar shabý atqa da, shabandozǵa da ońaı emes. Biraq kópshiliktiń qyzyǵy osy, jınalǵan jurtta esep joq, – deıdi at sporty oıyndarynyń tóreshisi Nadejda Velman.
Jasyndaı jarqyldap, tuıaǵy muz oıyp, qardy shasha boratqan tulparlar aınalymdy kózdi ashyp-jumǵansha shaýyp ótti. Jitiqara aýdanynyń sáıgúlikteri márege quıryq tistese birinen keıin biri jetti. 3 shaqyrymdy 3 mınýt 26 sekýndta shaýyp ótken Avınar atty sáıgúliktiń shabandozy Ernur Qutegenge 150 myń teńge syılyq tapsyryldy. Ekinshi, úshinshi bolyp jetken tulparlar shabandozdary da 100 myń jáne 50 myń teńge syılyqtaryn aldy.
Jeti shaqyrymdyq alaman báıgede Bashqurtstannan kelgen Iýmor degen tulpardyń baǵy jandy. Ol jeti shaqyrymdy 8 mınýt 39 sekýndta shaýyp ótti. Onyń shabandozy Ramıl Salahovqa 300 myń teńge tapsyryldy. Jitiqara aýdanynyń Toryn degen sáıgúligi bashqurtstandyq tulpardan bir sekýnd qana keshikti. Taran aýdanynan qatysqan Zırbına máreni úshinshi bolyp kesti.
Oblystyq ishki ister departamentiniń «Dınamo» jáne Qostanaı aýdany komandalarynyń arasynda ótken kókpar tartysy mereke qyzyǵyna aınaldy. At sporty oıyndarynan KSRO-nyń 9 márte chempıony atanǵan marqum Oraz Seıdahmetov Qostanaıda irgesin qalaǵan kókpar oıyny onshaqty jyldan beri damý ústinde. Sońǵy jyldary oblystyq ishki ister departamentiniń komandasy jarystarǵa úzbeı qatysyp júr. Bul joly da serkeshti salǵan dınamoshylardyń kúshi de, eptiligi de basym boldy. Qyz qýý qashanda ulttyq at sportynyń sáni sekildi. Kóktemniń altynkúrek samaly betten óbip, appaq qardyń ústinde quıyndaı shapqan úkili qyz ben bórikti jigittiń ozǵany emes, jarasymy-aq jurtty súısintti. Aýdaryspaq jigittiń bilek qarýy men eptiligin birdeı synady.
Qostanaı oblysynda sporttyń negizgi túrlerinen arnaıy sport mektepteri bar. Biraq ulttyq sport túrlerin damytýǵa osy ýaqytqa deıin asa kóńil bólinbeı kelgeni shyndyq edi. Bıylǵy Naýryz jankúıerge de, sportshyǵa da súıinshi habar ala keldi. Oblysta ulttyq sport túrleriniń sport mektebi ashylatyn boldy. Bıýdjetten osy ıgi iske arnap 43 mıllıon teńge qarjy bólý de qarastyrylyp qoıdy. Urpaq tárbıesine úles qosatyn ulttyq sport túrleri Qostanaıda da órken jaıatyn bolady.
Názıra JÁRIMBET,
«Egemen Qazaqstan»
QOSTANAI
