Á.Qasteev atyndaǵy Memlekettik óner mýzeıinde bastalǵan «Uly Jibek joly» kórmesine fransýz tildi elderdiń (Fransııa, Belgııa, Shveısarııa jáne Marokko) tótenshe jáne ókiletti elshileri ortaqtasyp, Frankofonııa merekesi men Frankofon kóktemi-2018 oqıǵasyna oraılastyrylǵan shara baspasóz májilisine ulasty. «Uly Jibek joly» kóılekter kórmesiniń ashylýy tek arnaıy shaqyrylǵandarǵa arnaldy.
Joǵaryda atap ótkendeı, erekshe kóılekterdi tigýge fransýz stılısi Lamın M muryndyq bolyp, tamasha ıdeıany Erlan Joldasbekov (brend YERLAN ZHOLDASBEK), Gaýhar Ahmetova (brend KIORI), Elmıra Maemerova (brend MIREL MARAT), Jarqyn Baımahanov (brend JARKYN BAIMAKHANOV), Alekseı Chjen men Larııa Jaqambaeva (brend ONE-TO-ONE), Tamara Lamanýkaeva (brend TAMARA LAMANUKAEVA) syndy otandastarymyz júzege asyrdy. Jáne bul dızaınerler Kazakhstan Fashion Week Ulttyq sán aptalyǵynyń turaqty qatysýshylary.
Al ismerlik óneriniń týyndylaryna toqtalsaq, onyń árqaısysy ózindik taqyryptarǵa ıe. Kórmege qoıylǵan kóılekter «Keshir, Aral», «Tańbaly tas» (avtory Erlan Joldasbekov), «Tomırıs patshaıym» (Kamılla Kım), «Halyqtar dostyǵy» (Gaýhar Ahmetova), «Babalar murasy» (Elmıra Maemerova), «La soif noire» (Jarqyn Baımahanov), «Jıhan kezý ýaqyty» (Alekseı Chjen men Larııa Jaqambaeva), «Amaga patshaıym» (Tamara Lamanýkaeva) dep atalady.
Kazakhstan Fashion Week PR-dırektory Botagóz Aldońǵarovanyń aıtýynsha, osy jobaǵa tartylǵan dızaınerler ony tamasha ıdeıa dep taýyp qana qoımaı, óz qabiletterin tanytýdyń erekshe múmkindigi dep qabyldaǵan. Osylaısha qazaqstandyqtar pret-a-porte úlgilerin týdyra otyryp, sán álemine óz qoltańbalaryn qosty.
Árbir kóılektiń taqyryby ǵana emes, tigilý tarıhy da bar. Matalar Fransııadan ákelinip, onyń oıý-sýretteri birneshe aı boıy salynǵan. Máselen, Kamılla Kımniń úlgisi birneshe júzdegen mata tilikterinen turady. Jáne munyń bári jymyn bildirmeı qaıta quralǵan. Qysqasy, árbir kóılekti týdyrýdyń óz kúrdeliligi men pálsafasy bar desek bolady.
Burnaǵy jyly da Almatydaǵy Fransııa elshiligi men Fransýz Alıansy osy jobany jalǵastyrý úshin Lamın M-dy Qazaqstanǵa shyǵarmashylyq saparmen shaqyrǵan-dy. «Uly Jibek joly» taqyrybyna birikken «alyp» kóılekterdiń birlesken jańa kolleksııasy – osy art-rezıdensııanyń nátıjesi.
Kórme 10-13 sáýir aralyǵyndaǵy Qazaqstan Ulttyq sán aptalyǵy bastalǵansha jalǵasady.
Aınash ESALI,
«Egemen Qazaqstan»
ALMATY
