... rızashylyǵyn jetkizedi
Joldyń oblystyq mańyzǵa ıe bolýyn quptaımyz
Elbasymyzdyń jyl saıynǵy halyqqa Joldaýynda úlken eldik máselelermen qatar, aýyldardyń turmys-tirshiligine arnaıy toqtalyp, árdaıym kóńil bólip otyratyny bizdi qýantady. Osy rette mańyzdy qujat aıasynda ózim depýtat bolyp saılanǵan Abyraly óńirindegi áleýmettik máselelerdiń qalaı sheshim taýyp jatqanyna az-kem toqtalyp ótsem deımin. Bul aımaqtaǵy eń ózekti máseleniń biri – «Semeı-Qaınar» jolynyń jaǵdaıy. Oblystyq máslıhattyń depýtaty retinde osy joldyń máselesin jyl saıyn kóterip, tıisti oryndarǵa aıtyp kelemin. Bul jol respýblıkalyq mańyzǵa ıe, sondyqtan qarjy respýblıkalyq bıýdjetten bólinedi. Byltyr osy jolǵa 570 mln teńge qarjy bólinip, Znamenka aýylynan ári qaraı 12 shaqyrym aýmaǵy jóndeldi. Parlament Májilisiniń depýtaty Nurtaı Sabılıanovqa respýblıkalyq bıýdjetten taǵy da qarjy bólý jóninde usynys jasap, kómek kórsetýin suraǵanbyz. Másele oń sheshimin taýyp, bıyl joldyń «Qaınar-Sarjal» aralyǵyndaǵy 38 shaqyrymyn jóndeýge 900 mln teńge bólindi. Oblys ákimi «Semeı-Qaınar» jolyn respýblıkalyq mańyzdan oblystyq mańyzǵa aýystyrý jóninde ortalyq vedomstvolarǵa usynys engizdi. Bul másele oń sheshimin tapsa, aımaq basshysy oblystyq bıýdjetten qarjy bólip, 26 jyl jóndeý kórmegen joldyń qalǵan bóligin aıaqtamaqshy. Osynyń bári elge, jerge degen memlekettiń qamqorlyǵy dep esepteımin.
Marat QURMANBAI,
oblystyq máslıhattyń depýtaty
SEMEI
...súısinis bildiredi
Dástúrlerimizdi jańǵyrta bileıik
«Egemen Qazaqstan» gazetinde jarııalanǵan “At tergeýdiń astarynda uıat bar” degen maqalany oqyp qýandym. Osydan on jyl buryn biraz otbasy О́zbekstannyń Tashkent oblysynan Pavlodar oblysy, Pavlodar aýdanynyń Efremovka aýylyna kóship keldik.
Jalpy, О́zbekstan qazaqtarynda dástúrler jaqsy saqtalǵan. Kelinderimiz qaı úıge barsyn úlken kisiler otyratyn bólmeniń tórin baspaıdy. Úlkenderge sálem salyp, tek kúıeýiniń týystaryn ǵana emes, sol aýyldaǵy úlkenderdiń, qaıyn sińlileriniń attaryn atamaıdy. Koreılerdiń kınolaryn kórgende kelinderiniń qaıyn sińli, qaıyn aǵasynyń attaryn atamaı, dástúrlerin saqtap kele jatqany súısindiredi.
Al bizdiń kınolarda kerisinshe dástúrdi attap ótip, jastarǵa keri tárbıe kórsetýde. Qazaq kelini ata-enesiniń attaryn atap, qazaq qyzynyń jigitti úıine izdep baryp, kelin bola salýy, oń jaqta otyryp aıaǵy aýyrlap qalǵan qyzǵa eshbir sógettigi joq, qalypty jaǵdaıdaı qaraýy bul qazaqqa jat qylyqtar. Qazirgideı jahandaný zamanynda jastardyń ulttyq tárbıeden alshaqtap bara jatqany ókinishti.
«Qazaqstan» telearnasynda sálem salýdy biraz dáriptegende rıza boldyq. Kelinniń úlken kisige «sálemetsiz be?» dep baqyraımaı, ıilip sálem salyp izet kórsetýi, qaıynsińli, qaıyndaryn «Erkem», «Tórem» dep erkelete ataýy júrekke jylylyq quımaı ma? Qazaqtyń árbir dástúri qundy. Olarda ádeptilikke, ımandylyqqa bastaıtyn tárbıe jatyr. Qundy dástúrlerimizdi tek jańǵyrta bileıik.
Marııa TÁŃGIRBAEVA,
zeınetker
Pavlodar oblysy
...dabyl qaǵady
Qaýip-qater seıilmeı tur
«Egemen Qazaqstan» gazetiniń osy jylǵy 31 qańtar kúngi sanynda jarııalanǵan «Elorda aınalasyndaǵy aýyldar artta qalmaıdy» degen maqalany oqyp, kópten beri ákimderge ótkize almaı júrgen bir tilegimizdi gazet arqyly taǵy kótergimiz keldi. Qosshy aýyly aýmaǵynan Nura ózeni kesip ótedi. О́zenge kópir salynǵanda onyń eki jaq erneýi ashyq qaldyrylǵan, qaýipsizdik sharalary eskerilmegen. Sonyń saldarynan talaı kólik sýǵa qulap, talaı adam ajal qushty. Balalarymyz jumysqa ketkende kópirden aman ótse eken dep alańdap otyramyz. Qys mezgilinde jol taıǵaq, óte qaýipti. Sondaı úlken ózende kópirdiń eki jaǵalaýynyń qorǵalmaýy adamdarǵa qoldan apat ákelýde.
Qosshy aýylynda birqatar jaqsy ister atqarylady dep jazypty. Halyqqa birinshi keregi qaýipsizdik. Sondyqtan Selınograd aýdanynyń ákimine kóshe-joldar jóndelmese de, osy kópirdiń eki erneýin qaýipsiz etip bekitip berse eken deımiz. Olaı bolmasa áli talaı kólik ózenge qulap, qaýip-qater seıilmek emes.
Qosshy aýylynyń turǵyndary atynan
M.ShAMENQYZY
Aqmola oblysy
...úlgi etedi
О́negeli bilim saıysy
Mańǵystaý aýdanynyń Ondy aýylynda zamanymyzdyń zańǵar tulǵasy Ábish Kekilbaevtyń shyǵarmalaryn nasıhattaýǵa arnalǵan dástúrli aýdandyq «Ábish oqýlary» bilim saıysy ótken bolatyn. Sharaǵa aýdannyń ár túkpirinen kóptegen oqýshylar qatysty. Ábish Kekilbaevtyń bilim alǵan shańyraǵynda alǵash ret ótken saıysta aýyl ákimi B.Balapanov: «Aýylymyzda tuńǵysh ret ótip otyrǵan sharanyń mańyzdylyǵy biz úshin joǵary. Ábish kózi tiri kezinde osy mektepke talaı ret kelip, jastarǵa aq batasyn bergen edi. Rýhanı jańǵyrý arqyly jazýshy shyǵarmalaryn nasıhattaý bolashaq urpaq úshin ulyqty is degim keledi», dedi.
Baıqaý bes bólimnen turdy. Olar: «Úı tapsyrmasy», «Mánerlep oqý», «Sahnalyq qoıylym», «О́leńderine sholý», «Jas daryndar bólimi», «Beıneleý óneri». Atalmysh sharada Qyzan, Ondy, Ushtaǵan, О́tes, Jarmysh aýyldarynyń jalyndy jastary belsendilik tanytyp, joǵary daıyndyqpen kelgenderi aıqyn kórindi.
Allabergen QONARBAEV
Mańǵystaý oblysy
...maqtan tutady
Aıyna 100 jınalmaly besik jasap júr
Aqtóbe qalasynda turatyn I top múgedegi Telman Muqashev Qazaqstannyń ár óńirinen tapsyrys alyp otyr. Sheberhana aıyna 100 besik jasaıdy. Eki jyl buryn sheberhana ashqan ol aǵashtan jınalmaly besik, ústel, oryndyq jasaıdy. Qyz jasaýyna qajetti sandyq ta bar. Sońǵy jyldary sánge aınalǵan et tabaqty da qaıyń aǵashynan oıyp jasaıdy. Qajetti aǵashtyń bári arnaıy tapsyryspen Bashqurtstannan ákelinip jatyr. О́zge óńirlerdiń tapsyrystary poshta arqyly jóneltiledi.
Súıikti isin kásipke aınaldyrǵan Telman Muqashev janyna birneshe adamdy jumysqa alǵan. Bar jaýapkershilik uly Abylaı Muqashevqa júktelgen. Ákeden kórgenin oıǵa túıip, aǵash oıýdy meńgergen uly bıznesti damytyp otyr. Qazir jınalmaly besikke suranys kóp.
Aman BOLSYN
AQTО́BE
