Elbasy Úndeýi aqysyz bilim alýǵa zor múm­kindik berdi

Endi Elbasy qoldaýynyń ar­qasynda jastarymyzǵa ózimizdiń elde aqysyz bilim alýǵa zor múm­kindik týdy. Ár oqý jylynda bóli­netin 54 myń grantqa qosymsha 20 myń grant bólinýi kóptegen jas­tar­dyń úmitin jaǵyp, joǵary bilim­ge degen qoljetimdilikti arttyryp otyr.

Qazirgi tańda aımaqtyq ýnıver­s­ıtetterdiń barlyǵy kóp salaly joǵary oqý oryndary. Iаǵnı tek bir baǵytta emes, ekonomıkalyq, pedagogıkalyq, gýmanıtarlyq, tehnıkalyq, agrarlyq, quqyq, jaratylystaný, taǵy basqa salalarǵa mamandar daıarlaıdy. Elbasynyń qosymsha bólip otyrǵan bilim grantyn aımaqtyq joǵary oqý oryn­daryna tapsyrǵan talapkerler de ıelene alady. I.Jan­súgirov atyndaǵy Jetisý memle­ket­tik ýnıversıteti de óńirde ornalasqan birden-bir kóp salaly bilim ordasy bolǵandyq­tan Almaty oblysynyń, jalpy respýblıkamyzdyń jas tur­ǵyndary bizdiń ýnıversıtetke talap­ker bolý arqyly baqtaryn synaýǵa múmkindikteri zor. Taǵy bir aıta ketetin jaǵymdy jańalyq, jyl saıyn Almaty oblysynyń ákimdigi áleýmettik kómek kórsetý jolymen júzdegen jastarǵa jergilikti bıýdjet esebinen bilim berý grantyn taǵaıyndaıdy. Máselen, byltyrǵy oqý jylynda 83 jas túrli mamandyqtar bo­ıynsha ákim grantymen bilim alyp jatyr. Bul úrdis bıyl da jalǵa­syn tabady degen senim joǵary. Sebebi Elbasynyń bes áleýmettik bastamasy jaryq kórgen kún­nen oblys ákimi Amandyq Batalov I.Jansúgirov atyndaǵy Jeti­sý memlekettik ýnıversıte­tine úlken qoldaý kórsetip, al­daǵy 2018-2019 oqý jylynda 100 grant bóletinin jetkizdi. Elbasy «Tórtinshi ónerkásiptik revolıýsııa jaǵdaıyndaǵy damýdyń jańa múmkindikteri» atty Joldaýynda da eldi sıfrlandyrý úderisine baılanysty tehnıkalyq mamandar daıyndaý kerektigin aıtqan bolatyn. Osy jolǵy Úndeýinde bólgen 20 myń bilim grantynyń 11 myńy tehnıkalyq mamandar daıyndaýǵa jumsalatynyn eske saldy. Bul óte durys sheshim. Eldiń ekonomıkasyn damytý úshin óndiris qashanda tý ustaýshy bolyp qala bermek. Qazir bul salany jańa tehnologııalarmen damytý úshin sıfrlandyrý jumystary bastaldy. Oǵan ınjenerlermen, tehnologtermen qatar IT-maman­dar óte qajet. Osy maqsatta biz al­daǵy oqý jylynda tehnıkalyq, agrarlyq sala boıynsha jańa ma­man­dyqtar ashýdy kózdep otyrmyz. Jańa mamandyqtar esebinen Elbasy bólgen qosymsha grant jetisýlyq jastarǵa da buıyrady dep oılaımyn. Ýnıversıtettegi qurylymdyq bólimder jumysyn, oqý prosesiniń keıbir tustaryn sıfrlandyrý maqsatynda jos­parlaý jáne sıfrlandyrý depar­tamentin quryp, naqty jumys­tardy qolǵa aldyq.

Elbasy Úndeýinde aıtyl­ǵan stýdentterdiń jataqhanadaǵy jaǵ­daıyn jaqsartý máselesi óte oryndy. Árıne buǵan deıin de stýdentterdi jataqhanamen qam­tamasyz etý máselesi kún tár­­tibi­nen túsken emes. Desek te Pre­zı­denttiń «2022 jyldyń sońy­na deıin stýdentterge arnap keminde 75 myń oryndyq jańa jataqhana salýdy tapsyramyn», deýi túıindi máseleni tarqatqandaı boldy. Munyń bilim ordalarynyń jaǵ­daıyn jaqsartýǵa, stýdent­ter­diń kúnkórisine, sabaqqa alań­syz qaraýyna yqpaly zor bolary sózsiz. I.Jansúgirov atyn­daǵy Jetisý memlekettik ýnıver­sı­te­tinde 524 oryndyq eki jataq­hana bar. Onda ata-anasy joq stýdentter tegin turady. Ob­lys or­talyǵynan shalǵaıda orna­las­qan eldi mekennen kelgen stýdent­ter, áleýmettik jaǵynan az qor­ǵalǵan, kóp balaly otbasynan shyqqan, jataqhanada turýǵa nıet bildirgen stýdentterdiń barlyǵy jataqhanamen qamtamasyz etilgen. Barlyq bólmeler turmystyq tehnıkamen, jumsaq jıhazdarmen jabdyqtalǵan. Degenmen de Elba­sy Úndeýinen keıin stýdentterge jańa jataqhana salý máselesi kóterilip, oblystyq ákimdikpen kelisim júrgizildi. Aldaǵy ýaqytta 500 oryndyq jańa jataqhana salý josparlanyp otyr. Qazirgi tańda jer bólinip, qujattar daıyndalyp jatyr.

Áleýmettik jaǵdaıdyń jaq­sarýy – qýatty elge aınalý jolyn­­daǵy qareket.

Qýat BAIMYRZAEV,

I.Jansúgirov atyndaǵy Jetisý memlekettik ýnıversıtetiniń

rektory, geografııa ǵylymdarynyń doktory, professor