О́tken jyly grantty jobalardy júzege asyrýǵa 618,5 mln teńge bólinip, 57 joba oń nátıje kórsetken. Sonyń ishinde 39 áleýmettik qyzmetter qurylyp, aqparat, bilim, keńes berý jáne áleýmettik qyzmetter kórsetý jandanǵan. Buǵan qosa, 35 zertteý, 400-ge jýyq oqytý sharalary júrgizilip, bul bastamalarǵa 39 ulttyq jáne 7 halyqaralyq sarapshylar tartylǵan.
Din isteri jáne azamattyq qoǵam mınıstrligi bıylǵy jyldyń enshisine 956 mln teńgege 11 baǵyt boıynsha 87 jobany júzege asyrýdy kózdep otyr. Oǵan qatysýǵa 202 úkimetik emes uıymnan 352 ótinish kelip túsken. Sonyń ishinde 251-i qabyldanyp, qalǵan 176,5 mln teńge kólemindegi 23 grant boıynsha baıqaýdyń qorytyndysy taıaýda anyqtalmaq.
Memlekettik grantqa usynylǵan jobalardyń ishinde jastardy áskerı-patrıottyq tárbıeleý boıynsha sharalar keshenin ótkizý, jas jazýshy-aqyndardyń jáne jýrnalısterdiń shyǵarmashylyq áleýetin damytý, kámletke tolmaǵan balalarmen jumys boıynsha áleýmettik qyzmet qurý, aýyldy aımaqtardaǵy turǵyndardyń qajettilikteri men muqtajdyqtaryn anyqtaý syndy máseleler nazarda bolmaq.
– Bizde úkimettik emes uıymdarǵa arnalǵan memlekettik áleýmettik tapsyrystar men memlekettik granttar respýblıka deńgeıinde júrgizilip keledi. Oǵan arnaıy qurylǵan komıssııa bekitilgen sharttar boıynsha taldaý jasap, sheshim shyǵarady. Tapsyrystar men granttarǵa usynylǵan jobalardyń baǵa júıesi birdeı. Aıyrmashylyǵy sol, munda granttyq jobalardy jeńip alǵan uıymdar túıitkildi máselelerdi sheshýdiń naqty joldaryn qarastyrýy tıis. Sondaı-aq granttyq jobany júzege asyrýmen qatar, bólingen qarajattyń 10 paıyzyn uıymnyń damýyna jumsaýǵa múmkindik týyp otyr. Bıyn 15 taqyryp boıynsha 50-ge jýyq jobany qaradym. Sapa jaǵynan aıtarlyqtaı ilgerileýshilik bar, – dedi Parlament Májilisiniń depýtaty, komıssııa tóraǵasy Serik Turaruly.
Erkejan AITQAZY,
«Egemen Qazaqstan»
