Dáriske L.N.Gýmılev atyndaǵy Eýrazııa ulttyq ýnıversıteti Jýrnalıstıka jáne saıasattaný fakýltetiniń 40-qa jýyq stýdenti qatysty. Áleýmettik jeli qoldanýshylary da sabaqty onlaın kórýge múmkindik aldy.
Dáristi «Qazaqparat» halyqaralyq aqparattyq agenttigi bas dırektory Asqar Omarov júrgizdi. Kezdesý barysynda búgingi jýrnalıstıkanyń jaı-kúıi, aqparat taratý týraly máseleler sóz boldy.
«Qazirgi kezde aqparat salasy ózgerip barady. Qazir áleýmettik jeli qoldanýshylary da aqparat taratýshy, nıýsmaker bola alady. Birinshiden, sonyń áserinen jalǵan aqparat sany da arta tústi. Ekinshiden, qoǵamǵa taǵy bir qaýipti jaǵdaı týdy, men muny «haıpokratııa» dep ataımyn. Mysaly bir sheshimge kedergi jasaımyn deseń, bireýge trollıng shabýyl uıymdastyrsańyz jetip jatyr. Haıp bastalsa, osynyń arqasynda biraz sheshim qabyldaýǵa bolady. Mysaly jaqynda Almatydaǵy restoranda bolǵan jaǵdaı da osy «haıptyń» bir kórinisi. Bul qoǵamǵa óte qaýipti jaǵdaı. Sebebi osynyń kóleńkesinde birshama bylyqty uıymdastyrýǵa bolady. Sondyqtan qazir qazaq jýrnalıstıkasynyń dárejesi óte mańyzdy. Jaqynda Fransııada jalǵan aqparatqa qarsy zań qaraldy. Sondyqtan osy olqylyqty boldyrmaý úshin qazirgi jýrnalıst nıýsmaker ǵana emes, trendsetter bolýy kerek» dedi.
Sondaı-aq, Asqar Omarov «Qazaqparat» HAA agenttiginiń jumysy, jedel ári senimdi aqparat taratý týraly aqparatpen bólisti.
Sonymen qatar, jas jýrnalıster áleýmettik jeli jáne jalǵan aqparat, jýrnalıstıka tóńireginde suraqtar qoıyp, óz pikirlerin ortaǵa saldy.
Mádına JÁLELQYZY,
«Egemen Qazaqstan»
Sýretti túsirgen Orynbaı BALMURAT
