2010 jyly irgesi qalanǵan álemdik standartqa saı bilim beretin elimizdegi biregeı joǵary oqý orny – Nazarbaev Ýnıversıteti jastardyń sapaly bilim alýyna jaǵdaı jasap, olardyń bolashaǵyna jarqyn jol ashýda ushan-teńiz jumys atqaryp, talaı ıgi bastamalarǵa muryndyq bolyp keledi. Sonyń biri – «Rýhanı jańǵyrý» mádenı ortalyǵy. Ýnıversıtette tek jaratylystaný men medısına baǵytynda bilim alatyn jastardy rýhanı kemeldendirý, ultynyń tarıhy men tabıǵatyn tanýda, árbir stýdentti ultjandy azamat etip tárbıeleýde atalmysh ortalyqtyń berer taǵylymy mol. Onyń bir dáleli – biz tamashalaǵan «Jyr – semser, kúı – qudiret, óleń – órnek» atty ádebı-sazdy kesh.
– Memleket basshysy Nursultan Nazarbaevtyń «Rýhanı jańǵyrý» maqalasynda erekshe atalyp ótken másele – ol ózińniń tegiń men tamyryńdy taný, tarıhyńa taǵzym etip, sodan taǵylym alý. Adam qansha bilimdi bolsa da, óz ultynyń bolmysy men tól tarıhyn bilmese, ol adamnyń eli úshin emirenip, Otanyna jan júregimen qyzmet etýi múmkin emes. Osy sebepti de jastarymyzdy tek jaratylystaný salasymen ǵana shektemeı, rýhanı kemeldendirýge, jan-jaqty, ıntellektýal adam bolyp er jetýine barynsha basymdyq berip, sol úshin aıanbaı jumys istep jatyrmyz. Nazarbaev Ýnıversıteti ujymynyń basty ustanymy – osy, – deıdi joba jetekshisi, Nazarbaev Ýnıversıteti janyndaǵy «Rýhanı jańǵyrý» mádenı ortalyǵynyń dırektory Gúltas Qurmanbaı.
Qazaq jáne aǵylshyn tilinde qatar júrgizilgen ádebı-sazdy óner keshinde stýdentter jyr atasy – Mahambet О́temisuly, kúı atasy – Qurmanǵazy Saǵyrbaıuly jáne poezııa patshaıymy – Farıza Ońǵarsynovanyń ómir jolyn baıandaıtyn teatrlandyrylǵan qyzyqty qoıylymdaryn kórermen nazaryna usyndy. Sonymen qatar shyǵarmashylyq ıeleriniń óleńderin naqyshyna keltire oqyp, Mahambet pen Qurmanǵazynyń rýhty kúılerin kúmbirlete oryndady. Ýnıversıtet ishinen qurylǵan «NU» (Nazarbaev University) ulttyq aspaptar orkestriniń oryndaýyndaǵy Mahambettiń «Jumyr qylysh», Qurmanǵazynyń «Saryarqa», «Serper» kúıleri keshke jınalǵan qaýymnyń qulaq quryshyn qandyrdy. Professor Mark Loýrens pen ýnıversıtettiń alǵashqy túlegi Nursultan Esenqulovtyń oryndaýyndaǵy Aqan Seriniń «Balqadısha» áni de kópshilik kóńilinen shyǵyp, qoǵam qaıratkeri Orazkúl Asanǵazy, ǵalym Aıgúl Ismaqova jáne ýnıversıtettiń professorlyq quramy bastaǵan kórermenderdiń ystyq yqylasyna bólendi. Osy arqyly Nazarbaev Ýnıversıteti stýdentteri tek ǵylym jolynda ǵana kóshbasshy emes, ónerdi ıgerý men rýhanı kemeldený turǵysynda baǵytyn aıqyndaǵan bolashaq naǵyz zııaly maman ekendigin kórsetti.
Mahambet О́temisuly, Qurmanǵazy Saǵyrbaıuly jáne Farıza Ońǵarsynova shyǵarmashylyǵyn biriktiretin ortaq tin – qazaqy rýh desek, sol otansúıgishtik sezimdi búgin kózderinde ot oınap, sózderinen ushqyn atqan jalyndy jastardyń deminen anyq sezindik. Mamandyǵyn jetik ıgerip qana qoımaı, eliniń tarıhy men ultynyń bolmysyn tanyp, talantyna taǵzym etýge baǵyttalǵan talpynysyna tánti boldyq.
Nazerke JUMABAI,
«Egemen Qazaqstan»
