Búgingi bizdiń keıipkerimiz – Ispanııa fýtbol quramasynyń jáne «Chelsı» klýbynyń shabýylshysy Pedro Rodrıges eshqashan jarqyrap kózge túsken emes. Qylyshyn dóp sermeıtin samýraılar sekildi dál ýaqytynda joq jerden shyǵa keledi. Sosyn bult qalqalaǵan kún tárizdi ataqty áriptesteriniń tasasyna qaıta enip ketedi. Onyń ómirine kóz júgirte otyryp, talaı qyzyqtyń kýási bolǵanyn, bıik shyńdy baǵyndyrý úshin qajyrly eńbektiń qajet ekenin túsinesiz.
Ataqty samýraı Iаmamoto Sýnetomo: «Dittegen maqsatynan adaspas úshin adam alǵan baǵyttan taımaýy kerek, ózin árdaıym jetildirip, eshteńeni nazardan tys qaldyrmaǵany jón. Mine, bul – naǵyz maqsat!» dep aıtqan eken. Pedro osy baǵytty berik ustanǵan. Ol jetistikke jetý úshin 1 paıyz talant pen 99 paıyz eńbektiń qajet ekenin jiti túsingen saıypqyran. Messı, Ronaldý sekildi fýtbol «juldyzdary» turǵanda eshkimniń Pedroǵa «altyn táj» kıgizbeıtini beseneden belgili. Tipti onyń boıynda Neımardikindeı talant ta joq.
Bizdiń keıipker ala doptyń álippesin 1997 jyly ózi týyp-ósken Kanar araldaryndaǵy «San-Isıdro» klýbynan úırendi. Úıine jaqyn ornalasqan klýbtyń negizgi quramynda alańǵa shyǵý úshin alty jyl kútýine týra kelipti. Keler jyly «Don Pedrony» úlken synaq kútip turǵan-dy. Birde Lıonel Messıdi Argentınadan taýyp, onyń «Barselonaǵa» kelýine jaǵdaı jasaǵan áıgili skaýt Jozep Kolomer Kanar aralynda ótken jasóspirimder týrnırine keledi. Onyń kózdegeni «Tenerıfte» dop tebetin Jeffren Sýares bolatyn. Alaıda Kolomerdiń qyraǵy kózi 17 jastaǵy Pedrıto esimdi fýtbolshyny qalt jibergen joq. Kóp uzamaı Pedro «Barselona» klýbynan shaqyrtý aldy.
Katalonııalyq klýbqa aýysa sala keıipkerimizdiń tasy órge domalady deýge kelmeıdi. Klýb akademııasynyń bir satysynan ekinshisine kóterilý ońaıǵa túsken joq. Tipti, basqa klýbqa aýysyp ketýi de múmkin edi. Katalonııalyq klýbtyń qosymsha «Barselona B» komandasy 2006-2007 jylǵy maýsymda sátsiz óner kórsetip, Ispanııanyń tórtinshi deńgeıli lıgasyna túsip qalady. Al bul týrnırde oınaıtyn «Barselona S» komandasy Ispanııa fýtbol federasııasynyń erejesine saı aımaqtyq lıgaǵa aýysýy tıis. Mundaı máselege bas qatyrǵan klýb basshylary ekinshi deńgeıli qosymsha klýbty taratyp jiberedi.
Ol kezde «Barselona S»-da ter tógip júrgen Pedro jıyrmaǵa jetken jigit bolatyn. Fýtbolshy úshin bul maqtanarlyq nátıje emes. Salystyryp kórińiz, Leo Messı men Raıan Gıggz sekildi «juldyzdar» 17 jasynan bastap jasyl alańda oıqastap, álemge tanylyp úlgergen-di. Endeshe, jıyrma jasta úshinshi deńgeıli lıgada oınaǵan jigittiń fýtbol Olımpin baǵyndyram degen armany oryndalmaıtyndaı kórinedi. Alaıda bizdiń keıipkerimiz alǵa qoıǵan maqsattyń eńbekpen keletinin túsindi hám búkil qıyndyqqa tóze bildi.
«Sabaqty ıne sátimen» demekshi, osyndaı aýmaly-tókpeli tusta Pedrıtoǵa jol siltep, aqyl-keńes aıtqan bir adam bar. Bylyqqa batqan «Barselona B»-ǵa bapker bolǵan Hosep Gvardıola Pedronyń komanda úshin qajet ekenine onyń kózin jetkizdi. Bapkerdiń sózinen qanat alǵan «Don Pedro» 2007-2008 jylǵy maýsymda sátti óner kórsetti. Oǵan qosa, Gvardıola men shákirtteri segýndaǵa (Ispanııanyń ekinshi deńgeıli lıgasy) qaıtyp oraldy. Sol jylǵy maýsymnyń sońynda Gvardıolanyń negizgi komandany jattyqtyratyny málim bolǵan. Bul – Pedroǵa berilgen qaıtalanbas múmkindik edi. Kanar aralynyń ókili ony barynsha paıdalana bildi...
Pedronyń «Barselonanyń» negizgi quramyndaǵy karerasy 2008 jyldyń 12 qańtarynan bastaldy. Katalonııalyq klýb óz alańynda «Mýrsııamen» kezdesýi tıis edi. Shabýylshysy Santıago Eskerronyń aýyryp qalýyna baılanysty kezdesýge shyǵa almaǵandyqtan, onyń ornyna Pedro shaqyrtý aldy. Ol kezde «Barsany» dańqty Frank Raıkaard jattyqtyratyn. Gollandııalyq bapkerge Pedro qosalqy quramdy toltyrý úshin ǵana kerek edi. Sol matchta bizdiń keıipkerimiz alańǵa oıyn aıaqtalýǵa bir mınýt qalǵanda shyǵyp, dúbirli dodanyń alǵashqy dámin tatty.
Hosep Gvardıola úshin 2008-2009 jylǵy maýsym tabysty aıaqtalǵany málim. Klýb ózi qatysqan týrnırdiń bárinde jeńiske jetip, alty kýbokty ıelenedi. Mundaı rekord buryn-sońdy tirkelgen emes. Ańyzǵa aınalǵan osy maýsymda Pedro jıi-jıi negizgi quramǵa shaqyrtý alyp, rekordtyq jeńiske óz úlesin qosty. Chempıondar lıgasy fınalynyń sońǵy mınýtynda alańǵa shyqqan «Don Pedro» qos qulaqty kýbokty basynan asyra kótergen Eýropadaǵy eń jas oıynshy atandy.
Kelesi jylǵy maýsymda Pedrıto ózin birjola moıyndatty. Áýeli Ispanııa Sýperkýbogine talas kezinde gol soǵyp kózge tústi. Al Eýropa Sýperkýboginde «Shahterge» soqqan goly «Barselonaǵa» jeńis syılady. Keıinnen el birinshiliginde, kýboktyq dodada jáne Chempıondar lıgasynda mergendigimen tanylǵan-dy. Sol jylǵy jeltoqsanda uıymdastyrylǵan Klýbtar arasynda ótken álem chempıonatynda da Pedro qarsylas qaqpashysyn qapy qaldyrdy. Ol bir maýsymda resmı týrnırdiń bárinde gol salǵan tuńǵysh fýtbolshy atandy. Nátıjesinde klýb basshylary oǵan kásibı kelisimshart usynyp, jeıdedegi «Pedrıto» esimin «Pedroǵa» aýystyrdy. Osylaısha jankúıerlerdiń ystyq yqylasyna bólenip, «Don Pedro» degen qurmetke ıe boldy.
Keler jyly bizdiń keıipker ulttyq quramaǵa shaqyrtý aldy. Ońtústik Afrıka respýblıkasynda ótken álem chempıonatynda Ispanııa eshkimge des bermeı, chempıondyq tájge ıe bolǵany málim. Sol fýtbol toıynda «roho-fýrııanyń» sapynda Pedro da óner kórsetti. Bir jyl buryn segýndada dop tepken fýtbolshy álem chempıony ataǵyn jeńip aldy! Eki jyldan keıin Eýropa chempıonatynda da Pedro ulttyq quramamen birge «qart qurlyqtyń» úzdigi atandy.
«Barselona» sapynda jeti jyl ter tókken Pedro jańa belesterdi baǵyndyrý qajet ekenin jaqsy túsindi. Onyń ústine katalonııalyq klýb Neımardy satyp alǵan bolatyn. Messı, Sýares, Neımar úshtigimen taıtalasý qıynǵa soǵatynyn baǵamdaǵan ol «Tumandy Albıonǵa» jol tartyp, «Chelsı» klýbymen kelisimshart jasasty. Qazirgi tańda Pedro – londondyq komandanyń negizgi oıynshylarynyń biri.
Pedro eshqashan kóp gol soǵyp kózge túspegen, ondaı qabiletke ıe bolýy da neǵaıbyl. Alaıda joq jerden shyǵa kelip, qaqpashymen betpe-bet qalady. Onyń boıynda doptyń baǵytyn sezetin keremet qabilet bar. Pedronyń soqqan goly komandasy úshin árdaıym mańyzdy. Ári onyń ómir joly talmaı eńbek etken adamnyń kez kelgen bıikti baǵyndyratynyn kórsetedi. Eger shydamdylyq pen tógilgen ter bolmaǵanda 25 jyl buryn Kanar aralynda bastalǵan taǵdyr tipti basqa arnaǵa burylýy múmkin ba edi, kim bilsin...
Abaı ASANKELDIULY,
«Egemen Qazaqstan»
