Taıaýda Temirtaý qalasy men Qurma aýyldyq okrýginde mektep jasyna deıingi balalarǵa arnalǵan eki shaǵyn ortalyq ashyldy. Qurma aýylyndaǵy «Erketaı» dep atalǵan nysan 50 balaǵa arnalǵan. Munda mýltımedııalyq kabınet, robot-tehnıka jáne psıholog mamannyń bólmeleri bar. Shaǵyn ortalyqta ártúrli jastaǵy balaqaılar eki top boıynsha qazaq jáne orys tilderinde til syndyrady. Ortalyqty jabdyqtaýǵa jumsalǵan 7 mln teńge qarajat jergilikti bıýdjetten bólingen.
Temirtaýdaǵy 100 orynǵa shaqtalǵan shaǵyn ortalyq qaladaǵy №22 orta mektep janynan ashyldy. Oqý ordasyndaǵy balalarǵa berilgen bos bólmelerge jalpy quny 120 mıllıon teńge bolatyn jóndeý jumystary júrgizilip, ishi talapqa saı jabdyqtalǵan. Búginde bilim mekemesi «Mektep – shaǵyn ortalyq» pishiminde jumys isteı bastady.
Bul shaǵyn ortalyqtardyń ashylýyna oblystaǵy memleket-jekemenshik áriptestiginiń damýy ıgi yqpalyn tıgizdi.
Qaırat ÁBILDA,
«Egemen Qazaqstan»
Qaraǵandy oblysy
