Pedagogıka ınstıtýtyn bitirgen qostanaılyq jastar ári qaraı joǵary bilimin magıstratýra, doktorantýra dárejesinde jalǵastyrý úshin olar Almatydaǵy eki joǵary oqý ornyna nemese irgedegi Reseıdiń pedagogıka ýnıversıtetterine barýy kerek bolatyn. Instıtýttan keıin otbasyn quryp, mektepterde qyzmet isteıtin muǵalimderge magıstratýrada oqý qıyndyq týǵyzatyn.
Joǵary oqý ornynyń jańa mártebesi bizge magıstratýra men doktorantýralyq oqý baǵdarlamalaryn ashýǵa zańdy múmkindik berdi. Biz psıhologııa jáne pedagogıka mamandyǵy boıynsha magıstratýra lısenzııasyn alyp ta úlgerdik. Aldaǵy jyldary túlekter 12-13 mamandyq boıynsha magıstratýra oqý baǵdarlamasyn syrttan izdemeı, ózimizde oqıtyn bolady, deıdi ýnıversıtet rektory Erkin Ábil. Sonymen qatar bilim ordasynda bir-eki mamandyq boıynsha doktorantýra oqý baǵdarlamasyn ashýǵa daıyndyq jumystary júrgizilýde.
Jańa pedagogıkalyq ýnıversıtette stýdentterdiń alańsyz bilim alýy úshin áleýmettik qolaıly jaǵdaı da jasalady. Elbasynyń «Prezıdenttiń bes áleýmettik bastamasy» Úndeýinen bastaý alatyn jumystar qazirdiń ózinde qolǵa alyndy. Bıyl 86 oryndyq bir jataqhananyń qurylysy bas talady. Tórt jylda ýnıversıtette barlyǵy 444 oryndyq jataqhana kesheni boı túzeıtin bolady. Ýnıversıtet rektorynyń aıtýynsha, aldaǵy jyldary bilim ordasy stýdentterdi jataqhanamen tolyq qamtıdy.
Qostanaı memlekettik pedagogıkalyq ýnıversıteti ınstıtýt bolyp turǵanda da oǵan jastar tek Qostanaı tóńireginen ǵana emes, Qazaqstannyń soltústik oblystarynan da kelip oqıtyn. Qazir «Serpin» baǵdarlamasy boıynsha Qazaqstannyń ońtústik oblystarynan, bir semestrge Qytaıdan kelip oqyp jatqan jastar bar. Jataqhana máselesi sheshimin tapqan ýaqytta ýnıversıtet ujymy Qyrǵyzstannan, О́zbekstannan, Túrikmenstannan, kórshi Reseıden de talapkerler tartýdy, olarǵa arnap qosymsha baǵdarlama jasaýdy da oılastyryp otyr.
Názıra JÁRIMBET,
«Egemen Qazaqstan»
QOSTANAI
