Osy jáne basqa máselelerdi Memlekettik qyzmet isteri jáne sybaılas jemqorlyqqa qarsy is-qımyl agenttiginiń Batys Qazaqstan oblysy boıynsha departamentiniń basshysy, ádep jónindegi keńes tóraǵasy Bolat Isaqov óńirlik kommýnıkasııalar qyzmetinde ótken brıfıngte jýrnalısterge aıtyp berdi. Baspasóz máslıhatynda departamenttiń bıylǵy 3 aıdaǵy jumysy qorytyndylandy.
Jyl basynan beri óńirde ákimshilik memlekettik bos laýazymdarǵa 413 konkýrs ótkizilgen eken. Alaıda synaqqa qatysqan 439 úmitkerdiń 225-i ǵana jeńimpaz bolǵan. Osy ýaqytta zańdylyqty bilý baǵytyndaǵy testileýge 502 adam qatysyp, testileýden 213 kandıdat ótipti.
– Memlekettik qyzmet týraly zańnamanyń qoldanylýyn jáne qyzmettik ádeptiń saqtaýyn tekserý kezinde 209 zań buzýshylyq anyqtaldy, – deıdi Bolat Isaqov.
О́ńirdegi ádep jónindegi keńes aı saıyn otyrys ótkizedi. Jyl basynan beri ótken 3 keńeste 17 másele qaralypty. Onyń altaýy – tártiptik ister. Nátıjesinde memlekettik qyzmetke kir keltiretin tártipsizdik teris qylyqqa jol bergeni úshin jáne Ádep kodeksi talaptaryn buzǵany úshin 4 memlekettik qyzmetshige tártiptik jaza qoldaný usynylǵan.
Ádep jónindegi keńestiń aldaǵy otyrysynda Ulttyq ekonomıka mınıstrligi Tabıǵı monopolııalardy retteý jáne básekelestikti qorǵaý komıteti Batys Qazaqstan oblysy boıynsha departamentiniń basshysy M.Ospanovtyń isi qaralatyn boldy. Jaqynda YouTube arnasynda Murat Ospanovty Oral qalasyndaǵy túngi klýbtardyń birinen kóterip shyǵaryp alyp bara jatqandyǵyn beınelegen beınerolık jaryq kórgen edi.
– Keshe men bul máselege qatysty tártiptik is qozǵaý týraly buıryqqa qol qoıdym. M.Ospanovtyń ózinen oqıǵaǵa qatysty túsinikteme alyndy. Biz aldaǵy ýaqytta departament basshysynyń isin BQO ádep jónindegi keńes otyrysynda qaraıtyn bolamyz, – dedi B.Isaqov.
Batys Qazaqstan oblysynda 2018 jyldyń alǵashqy úsh aıynda turǵyndarǵa 1007705 márte memlekettik qyzmet kórsetilgen eken. Jyl ótken saıyn qaǵazben jumys azaıyp keledi. Bul saladaǵy qaǵaz aınalymy byltyrǵy 24%-dan 18,7%-ǵa tómendegen. Al elektrondy formattaǵy qyzmet barlyq qyzmettiń 44,3%-yn qurap otyr.
Aımaqta jyl basynan beri turǵyndardyń ózine-ózi qyzmet kórsetetin 104 pýnkt jáne stýdentterge qyzmet kórsetý ortalyǵy ashylǵan.
2018 jyldyń I toqsanynda óńirdegi 8 memlekettik organda sybaılas jemqorlyq jasaýǵa yqpal etetin sebepter men jaǵdaılardy anyqtaý úshin syrttaı taldaý júrgizilgen. Nátıjesinde sybaılas jemqorlyqqa aparýy múmkin 35 faktor anyqtalǵan.
Qazbek QUTTYMURATULY,
«Egemen Qazaqstan»
Batys Qazaqstan oblysy
